2020 jyldyń 10 aiynda gaz tutyný kólemi 12,4 mlrd tekshe metrdi qurady. Bul týraly búgin Úkimet otyrysynda QR Energetika ministri Nurlan Noǵaev aitty, dep habarlaidy "Ult aqparat".
«Elde jańa tutynýshylardyń paida bolýyna bailanysty gaz tutynýdyń ósý tendentsiiasy baiqalady. Máselen, sońǵy 5 jylda, 2015-2019 jyldary gazdy tutyný 12,1-den 16,3 mlrd tekshe metrge deiin nemese 35 paiyzǵa ulǵaidy. Osy jyldyń 10 aiynda gaz tutyný kólemi 12,4 mlrd tekshe metr nemese ótken jyldyń sáikes kezeńine 102 paiyzdy qurady», - dedi ministr.
Sonymen qatar ministr eldi gazdandyrý da artyp kele jatqanyn aitty.
«Eldi gazdandyrýdyń 2015-2030 jyldarǵa arnalǵan bas shemasyn iske asyrý aiasynda jyl saiyn memlekettik biýdjetten gazdandyrýǵa qomaqty qarajat bólinedi. 2020 jylǵy 1 qańtardaǵy jaǵdai boiynsha eldi gazdandyrý deńgeii 51,47 paiyzdy qurady nemese 9,5 mln adam kógildir otynǵa qol jetkizdi. Osy jyldyń qorytyndysy boiynsha gazdandyrý deńgeiin 53,07 paiyzǵa qol jetkizý kútilýde. Bul 2015 jylǵy deńgeiden 10,07 paiyzǵa artyq. 2015-2020 jyldar kezeńinde gazdandyrylǵan eldi mekenderdiń ósimi 286 birlikti, halyqtyń ósimi 2,4 mln adamdy quraityn bolady», - dedi ol.
Nurlan Noǵaev 2020 jylǵy 1 qańtardaǵy jaǵdai boiynsha gazdandyrý deńgeii 90 paiyzdan asatyn neǵurlym gazdandyrylǵan óńirlerdi atady. Mundai óńirler qataryna kiretin Atyraý oblysy – 99,6, Mańǵystaý oblysy – 99, Almaty qalasy – 98,8, Batys Qazaqstan oblysy – 96,2, Shymkent qalasy – 92,1 jáne Aqtóbe oblysy – 90,1 paiyz gazdandyrylǵan.
«Jalpy, elimizdiń 6 162 eldi mekeniniń 1 468-i nemese olardyń jalpy sanynyń 24 paiyzy gazdandyrylǵan», - dedi Nurlan Noǵaev.
