2020 jyldyń birinshi jartyjyldyǵynyń sońyna deiin turaqty baǵdarlarda jolaýshylar tasymalyn júzege asyratyn barlyq áýe kompaniialary tekseriledi. Bul jaiynda QR Premer-Ministri Asqar Maminniń Májilis depýtattarynyń saýalyna bergen jaýabynda aitylǵan, dep habarlaidy "Ult aqparat".
«Búgingi kúni «Qazaqstan Respýblikasynyń áýe keńistigin paidalaný jáne aviatsiialyq qyzmet týraly» Zańǵa sáikes «Bek Air « áýe kompaniiasynyń eksplýatant sertifikaty toqtatyldy. Memleketaralyq aviatsiia komiteti (MAK, Máskeý q.) áýe kemesiniń ózdiginen jazatyn 2 bort quralyndaǵy málimetterdi júktep aldy jáne MAK mamandary qorytyndy daiyndap jatyr. Áýe apatyn tergeýdi IIM jedel tergeý toby, onyń barysyn qadalaǵaýdy Bas kólik prokýratýrasy júzege asyrady. Sotqa deiingi tergeý jalǵasyp jatyr. Negizgi eki nusqa qarastyrylýda. Birinshisi – áýe kemesi qanattaryna muzdyń qatýy. Halyqaralyq mamandardy tartý arqyly bul nusqany tekserý úshin ushaqty ushýǵa daiyndyq barysynda ony muz qatýyn boldyrmaý úshin óńdeý protsedýralarynyń buzylýy zerdelenip jatyr. Ekinshisi – áýe kemesiniń tehnikalyq aqaýy jáne ushqysh qateligi. Bul nusqa aiasynda shtattan tys jaǵdai kezinde ekipajdyń áreketine baǵa berýge baǵyttalǵan tergeý amaldary jalǵasýda. Tergeý qorytyndysy boiynsha oryn alǵan qaiǵyly jaitqa qatysy bar kúdikti tulǵalarǵa shara qabyldaý týraly BAQ-ta jariialaý máselesi qabyldanady», - dedi Asqar Mamin.
Sonymen qatar Úkimet basshysy Eńbek kodeksine sáikes, eńbek qyzmetimen bailanysty qaiǵyly jaitty tergeý jónindegi arnaiy komissiia qurylǵan. Toptyń tergeý qorytyndysyna sáikes, jumysshylardyń kinási - 0, jumys berýshiniń kinási 100 paiyz dep tanylǵan. Jumys berýshige qaza tapqan jumysshylardyń otbasyna saqtandyrý tólemderin júzege asyrý qajettigili týraly saqtandyrý kompaniiasyna habarlandyrý tapsyrylǵan. Búgingi kúni jergilikti atqarýshy organdar tarapynan zardap shegýshilerge materialdyq kómek kórsetý jumystary júrgizildi. Turǵylyqty jerleri boiynsha zardap shekken 46 jolaýshyǵa 1 million teńgege deiin, qaza tapqan 12 adamnyń otbasylaryna 4 million teńgeden aqshalai kómek kórsetilgen. Sonymen qatar atalǵan áýe kompaniiasynyń oryndalmaǵan reisterine bilet satyp alǵan jolaýshylardyń aqshalai qarajattaryn qaitarý boiynsha sotqa shaǵym túsirilgen.
«Munan bólek, Memleket basshysynyń tapsyrmasyna sáikes, 2020 jyldyń birinshi jartyjyldyǵynyń sońyna deiin turaqty baǵdarlarda jolaýshylar tasymalyn júzege asyratyn barlyq áýe kompaniialary tekseriletin bolady. Tolyqtai alǵanda, memlekettik organdar ushaq apaty kezinde zardap shekkenderge materialdyq jáne konsýltatsiialyq kómek kórsetý, sonymen qatar áýe kompaniaisynyń oryndalmaǵan reisteri jolaýshylarynyń aqsha qarajattaryn qaitarý boiynsha jan-jaqty sharalar qabyldanyp jatyr», - dedi Premer-Ministr.
Eske salaiyq, QR Indýstriia jáne infraqurylymdyq damý ministrligi «Bek Air» kompaniiasyna júrgizilgen jospardan tys tekserý qorytyndysyn jariialaǵan bolatyn.
