Prezident Qasym-Jomart Toqaev "QazMunaiGaz" UK AQ basqarma tóraǵasy Maǵzum Myrzaǵalievti qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy "QazMunaiGaz" ulttyq kompaniiasy janar-jaǵarmai naryǵyndaǵy jaǵdaidy turaqtandyrý úshin qabyldap jatqan sharalary týraly esepti tyńdady.
Kompaniia basshysynyń málimetine sáikes, biyl Qazaqstanda 17 million tonna munai ónimderi óndiriledi. Bul – rekordtyq kórsetkish.
Shymkent jáne Atyraý munai óńdeý zaýyttaryndaǵy josparly jóndeý jumystaryn keiinge shegerý jóninde sheshim qabyldandy. Bul ishki naryqty qosymsha 150 myń tonnaǵa deiin dizel otynymen qamtamasyz etýge múmkindik beredi. Sondai-aq "Qazaqstan temir joly" ulttyq kompaniiasy 100 myń tonnaǵa deiin dizel otynyn importtaidy.
Maǵzum Myrzaǵaliev "QazMunaiGazdyń" munai-gaz himiiasy salasyndaǵy jobalarynyń júzege asyrylýy jóninde baiandady. Qazirgi ýaqytta Atyraý oblysyndaǵy polipropilen óndiretin zaýytty iske qosý jumystary aiaqtaldy. Kásiporyn bir aidyń ishinde iske qosylady dep josparlanyp otyr. Budan bólek, Prezidentke polietilen jáne býtadien óndirisine qatysty jobalardyń júzege asyrylý barysy týraly da aityldy.
Memleket basshysyna Kaspii qubyr jelisi konsortsiýmynyń teńiz terminalyndaǵy qazirgi ahýal jóninde málimet berildi. Munai tankerlerge turaqty túrde quiylyp, kestege sáikes jóneltilip jatyr.
Kezdesý qorytyndysy boiynsha Memleket basshysy investitsiialyq jobalardy júzege asyrýǵa qatysty birqatar tapsyrma berdi.
