Tústik óńirden bastaý alǵan Qazaq romansiadasy baiqaýyna biyl 20 jyl tolyp otyr. Osy dataly merekege orai Ońtústik Qazaqstan oblysy ákiminiń orynbasary Ulasbek Sádibekov baiqaý qonaqtary men qazylar alqasy múshelerimen kezdesip, mereili merekemen quttyqtady, dep habarlaidy "Ult aqparat" aimaq basshysynyń baspasóz qyzmetine silteme jasap.
Kezdesýde sóz alǵan Ulasbek Sádibekuly baiqaýdyń 20 jyldyq ǵumyryna baǵa berip, romansiadaǵa atsalyp júrgen shyǵarmashylyq ujymdarǵa tabys tiledi. Oblys ákiminiń orynbasary kezdesý barysynda baiqaýdyń mereitoiyna orai qazylar alqasynyń turaqty tóraiymy Galina Preobrajenskaiaǵa Ońtústik Qazaqstan oblysyna sińirgen erekshe eńbegi úshin medalin saltanatty túrde tabys etti.
«Óner qashanda óziniń qudireti men kieliligimen erekshelenedi. Uly ónerdi jandandyryp kele jatqan romans oryndaýshylarynyń ashyq baiqaýyn ótkizý sonaý 1997 jyly qolǵa alynǵan bolatyn. Osy jyldar arasynda talai talanttardyń tomaǵasyn sypyrǵan baiqaý 2003 jyldan bastap halyqaralyq konkýrs mártebesine ie boldy. Osynyń ózi baiqaýdyń joǵary deńgeide uiymdastyrylyp, eldiń erekshe yqylasyna bólenip kele jatqanyn aiqyndaidy»,- dedi Ulasbek Sádibekuly.
Kezdesý barysynda sóz alǵan qonaqtar qazaq ramansiadasynyń tarihynan syr shertip, ónerge erekshe qoldaý bildirip otyrǵan oblys ákimine alǵystaryn jetkizdi.
Aita keteiik, biylǵy baiqaýǵa qatysýǵa 16 men 27 jas aralyǵyndaǵy 50 úmitker ótinim beripti. Qazir baiqaýdyń irikteý kezeńi ótip jatyr. Al romansiada qorytyndysy 20 qazan saǵat keshki 19.00-de «Túrkistan» saraiynda ótetin gala-kontsertpen aiaqtalady.
