Biyl 2,6 shaqyrym jol kólik qozǵalysy úshin ashylady. Bul týraly Ortalyq kommýnikatsiialar qyzmetindegi brifingte QR IIDM Avtomobil joldary komitetiniń tóraǵasy Sairanbek Barmaqov aitty, dep habarlaidy QazAqparat.
«Biyl avtomobil joldarynyń 4 myń shaqyrymy qurylys jumystarymen qamtylady. Jyl sońyna deiin avtomobil joldarynyń 2,6 myń shaqyrymynda, atap aitqanda myna joldarda qozǵalysty ashý josparlanyp otyr: «Qaraǵandy-Balqash-Qapshaǵai» – 645 shaqyrym, «Aqtóbe-Atyraý-Astrahan» – 279 shaqyrym, «Taldyqorǵan-Óskemen» - 763 shaqyrym, «Qalbataý-Maiqapshaǵai» – 415 shaqyrym, «Merki-Býrylbaital» – 266 shaqyrym, «Úsharal – Dostyq» – 60 shaqyrym, «Uzynaǵash-Otar» – 56 shaqyrym, «Kókshetaý-Petropavl-Qorǵan» – 67 shaqyrym, «Qostanai-Denisovka» – 60 shaqyrym», - dedi komitet basshysy.
Onyń aitýynsha, jobalardy ýaqytyly iske asyrý úshin daiyndyq jumystary tolyq kólemde júrgizilip jatyr. Tehnika men qurylys materialdary daiyndaldy. Avtomobil joldary salasynda qoldanylatyn jol-qurylys materialdarynyń barlyǵy otandyq óndiris ónimderi. Olar: inertti materialdar, bitým, tsement, temir-beton buiymdary, himiialyq qospalardyń azǵantai úlesi men jasandy qurylymdardyń jeke elementterinen basqa metall qurylymdar.
«Naýryz aiynyń sońynda ońtústik óńirlerde qurylys-montaj jumystary bastalyp ketti. Aýa raiynyń qolaily jaǵdaiy ornaǵanda jumystar soltústik óńirlerge qarai aýyp, sáýir aiynyń sońyna deiin jolshylar barlyq jobalar aiasyndaǵy qurylys jumystaryna kirisetin bolady. Qurylys alańdarynyń barlyǵynda mamandardy koronavirýstan qorǵaýǵa qajetti sharalar qabyldandy. Barlyq qyzmetkerler jeke qorǵanys quraldarymen qamtamasyz etildi», - dedi Sairanbek Barmaqov.
