2023 jylǵa qarai úleskerlik qurylystaǵy barlyq problemaly turǵyn úilerdiń qurylysy aiaqtalady.
Bul týraly Májilistegi «Nur Otan» partiiasy parlamenttik fraktsiiasynyń keńeitilgen otyrysynda Úkimet basshysy Asqar Mamin aitty, dep habarlaidy QazAqparat.
«Shaǵyn jáne monoqalardy qosa alǵanda, qalalarda ómirdiń jaily jáne qaýipsiz jaǵdaiyn qamtamasyz etý jumysy jalǵasady. 2023 jylǵa qarai úleskerlik qurylystaǵy barlyq problemaly turǵyn úilerdiń qurylysy aiaqtalady. 2025 jylǵa qarai barlyq respýblikalyq joldar jańǵyrtylyp, jóndeledi jáne jol boiyndaǵy servispen qamtamasyz etiledi», - dedi Úkimet basshysy «Nur Otan» partiiasynyń «Ózgerister joly: ár azamatqa laiyqty ómir!» Sailaý baǵdarlamasyn oryndaýdyń Jol kartasyn talqylaý barysynda.
Premer-Ministrdiń aitýynsha, biyl 2,2 myń shaqyrym avtomobil joly jańǵyrtylyp, respýblikalyq joldardyń 66 paiyzy jol boiyndaǵy servispen qamtamasyz etiledi.
«2025 jyly barlyq oblys ortalyǵy men respýblikalyq mańyzy bar qalalar joǵary jyldamdyqty 5G internetpen qamtylatyn bolady. Biyl Nur-Sultan qalasynda, 2022 jyly Almaty qalasynda pilottyq iske qosý júzege asyrylyp, odan keiin respýblikalyq mańyzy bar qalalarda jáne barlyq oblys ortalyqtarynda óndiristik paidalanýǵa engiziledi», - dedi ol.
Úkimet basshysy Nur-Sultan, Qaraǵandy, Jezqazǵan jáne Temirtaý qalalarynyń 350 myńnan astam turǵyny kógildir otynǵa qol jetkizetindigin aitty.
«2021 jyly 68 myń adam gazǵa qol jetkizip, odan keiin jyl saiyn keńeitý esebinen maqsatty kórsetkishke jetkiziledi», - dedi Asqar Mamin.
