Foto: Midjourney
Prezident Qasym-Jomart Toqaevtyń tóraǵalyǵymen Úkimettiń keńeitilgen otyrysynda qurǵaqshylyq pen sý tapshylyǵy máselesin kóterip, sý únemdeý tehnologiiasyn keń aýqymda engizýdi tapsyrdy, - dep habarlaidy «Ult aqparat» Kazinformǵa silteme jasap.
«Byltyr Jambyl oblysynyń diqandary sý tapshylyǵynan qatty zardap shekti. Biyl da qurǵaqshylyq bolýy múmkin. Arnaiy qurylǵan Sý resýrstary jáne irrigatsiia ministrliginiń jumysy ázirge oidaǵydai nátije bergen joq. Al, kórshi memleketter sý tapshylyǵyn joiý úshin naqty maqsat qoiyp, belsendi jumys istep jatyr. Al bizde sý resýrstaryn basqarý júiesin damytý tujyrymdamasy jaqynda ǵana qabyldandy. Bul qujat tym uzaq talqylandy», - dedi Prezident.
Memleket basshysy jaǵdaidyń óte kúrdeli ekenin ashyq aitty.
«Mysaly, elimizdegi sýarmaly jerdiń 13 paiyzynda ǵana sý únemdeý tehnologiiasy bar. Ásirese, Túrkistan jáne Qyzylorda oblystaryndaǵy jaǵdai múshkil, qurǵaqshylyq qaýpi asa joǵary. Soǵan qaramastan, osy aimaqtarda tiisti jumys júrgizilip jatqan joq. Sondyqtan, sýdy kóp qajet etetin daqyldardy azaityp, qurǵaqshylyqqa tózimdi daqyldardy kóbeitý kerek, sý únemdeitin tehnologiiany engizý qajet. Ahýaldy jaqsartý úshin batyl áreket jasaý kerek», - dedi Q. Toqaev.
Prezidenttiń pikirinshe, eń aldymen, sý únemdeý tehnologiiasyn keń aýqymda engizgen jón.
«Shyny kerek, biz sýdy tym orynsyz jumsaimyz. «Sýdyń da suraýy bar». Búkil el bolyp sýdy únemdep paidalaný mádenietin qalyptastyrýymyz kerek. Kórshi memleketterdiń tájiribesin zerttep, tiimdi tustaryn alý qajet. Eldi sýmen qamtamasyz etý – asa mańyzdy mindet, ulttyq qaýipsizdik máselesi deýge bolady. Ónerkásipte, agrosektorda, kommýnaldyq sharýashylyqta, jalpy, barlyq salada sýdy tiimdi paidalaný máselesine erekshe mán berý qajet», - dedi ol.
