Almaty qalasynyń ákimi Baqytjan Saǵyntaev Eýraziialyq zań akademiiasynyń kópsalaly kesheninde boldy, dep habarlaidy "Ult aqparat".
Megapolis ákimi Instagram-daǵy paraqshasynda qaladaǵy joǵary oqý oryndarynyń stýdent jastardyń ómir súrý jaǵdailaryn jaqsartý úshin jataqhanalar salyp jatqanyn aitty. Bul – Elbasynyń «Bes áleýmettik bastamasyndaǵy» negizgi mindettiń biri.
«Dinmuhamed Qonaev atyndaǵy Eýraziialyq zań akademiiasynda ashylǵaly jatqan kópsalaly keshende boldym. 100 stýdentke arnalǵan oryn, oqytýshylarǵa arnalǵan bólmeler, sondai-aq turmysqa qajet ashana, kir jýatyn oryn, kitaphana, medpýnkt, internet synyptar qarastyrylǵan», - dep jazdy B. Saǵyntaev.
Sońǵy eki jylda joǵary oqý oryndary 1,5 myń orynǵa jýyq 5 jataqhana saldy jáne modernizatsiialandy. Biyl 1,7 myń stýdentke arnalǵan taǵy eki ǵimarattyń qurylysy bastaldy.
«Almaty – jastar qalasy. Sondyqtan bilim alyp júrgen jastardyń ómir súrý men turmys jaǵdaiyn jaqsartý boiynsha jumystardy jalǵastyra beremiz», - dep atap ótti Almaty ákimi.
