Azamattyq hal aktilerin tirkeý salasyndaǵy memlekettik qyzmetter elektrondyq formatqa aýystyrylady. Bul týraly QR Ádilet vitse-ministri Azamat Ámirǵaliev aitty, dep habarlaidy QazAqparat.
«2020 jyly virýstyq shabýyldardan, derekterdiń tarap ketýinen qorǵaityn jáne monitoring júrgizetin júieler engizildi, ol aqparattyq qaýipsizdiktiń tiisti deńgeiin qamtamasyz etti. Atap aitqanda, 2020 jyly 17 botnet, IP-adresterde 214 osal sala joiyldy, 5 joǵary jáne tómen belsendiliktegi jelilik shabýylǵa jol berilmedi», - dedi Azamat Ámirǵaliev ministrliktiń keńeitilgen alqa otyrysynda.
Degenmen, vitse-ministr atalǵan baǵyttardaǵy jumysty odan ári jetildirý maqsatynda 2021 jyldyń birinshi jartyjyldyǵynda birqatar mindetti júzege asyrý qajet ekenin aitty.
«Tsifrlyq damý, innovatsiialar jáne aeroǵarysh ónerkásibi ministrligimen birlesip, azamattyq hal aktilerin tirkeý salasyndaǵy memlekettik qyzmetterdi «elektrondyq úkimet» portaly arqyly elektrondyq formatqa aýystyrý boiynsha sharalardy qabyldasyn. Ádilet departamentteri jergilikti atqarýshy organdarmen jáne Azamattarǵa arnalǵan úkimetpen birlesip, «Turǵyn úi qatynastary týraly» Zańyn múliktiń menshik ieleri birlestigi men kondominiým nysanyn qurý bóliginde júzege asyrýdy qamtamasyz etsin», - dedi vitse-ministr.
Onyń aitýynsha, sarapshylardyń biliktiligin arttyrý, saraptamanyń jańa túrleri úshin joǵary bilikti mamandarmen tolyqtyrý, sondai-aq zertteýlerdiń jańa metodikalaryn engizý boiynsha jumysty jalǵastyrý qajet. Memlekettik qyzmetterdiń kórsetilý merzimderin buzbaý, olardyń sapaly kórsetilýin jáne biznes-protsessterdiń saqtalýyn qamtamasyz etý boiynsha tiisti sharalardy qabyldaý kerek. «Digital Justice» jobalaryn júzege asyrý boiynsha jol kartalarynyń oryndalýyn qamtamasyz etý jáne ministrliktiń arhitektýrasyna tiisti ózgerister engizý qajet.
«Tsifrlyq Qazaqstan» memlekettik baǵdarlamasy tarmaqtarynyń oryndalýyn qamtamasyz etý jáne E-saraptama, E-zan komegi, E-apostil júielerin respýblikanyń barlyq aýmaqtarynda taratý; aqparattyq qaýipsizdik boiynsha biryńǵai talaptarǵa sáikes osy jyldyń 1-jartyjyldyǵynyń aiaǵyna deiin operatsiialyq júielerdi eskirgen nusqalaryn joia otyryp, Windows-10-ǵa jańartý jáne 2020 jyldyń aiaǵyna deiin inventarizatsiia qorytyndysy boiynsha eskirgen kompiýterler parkin aýystyrýdy qamtamasyz etý kerek», - dedi Azamat Ámirǵaliev.
