QR Ekologiia, geologiia jáne tabiǵi resýrstar ministri Serikqali Brekeshevtiń aitýynsha, Aqmola oblysynyń Arshaly jáne Tselinograd aýdandarynda jyl saiyn tasqyn qaýpi týyndaýyna antropogendik protses sebepker bolyp otyr. Bul týraly ol Úkimet otyrysynda aitty, dep habarlaidy QazAqparat.
«Biyl taǵy 6 sý qoimany qalpyna keltirýdi josparlap otyrmyz. Qalǵan 19-y 2025 jyldyń sońyna deiin qalpyna keltiriledi», - degen ministr keiingi jyldary kóktemgi sý tasqynyna tabiǵi jaǵdailar ǵana emes, antropogendik protsesster de túrtki bolyp jatqanyn atap ótti.
«Máselen, jyl saiyn sý tasqyny kezeńinde Aqmola oblysynyń Arshaly jáne Tselinograd aýdandaryndaǵy Esil jáne Nura ózenderiniń arnasymen Astana sý qoimasynan jiberý kezinde sý basqan arnanyń ótkizý qabiletiniń bolmaýyna bailanysty irgeles aýmaqty sý basý qaýpi týyndaýda.
Atalǵan jaǵdailar Qaraǵandy (Nura ózeni), Soltústik Qazaqstan (Sileti, Esil ózenderi) jáne Qostanai oblystary (Tobyl ózeni) aýmaǵynda oryn alýda», - dedi ol Úkimet otyrysynda.
Ministr osyǵan bailanysty ákimdikterge Aqmola, Qaraǵandy, Qostanai jáne Soltústik Qazaqstan oblystaryndaǵy problemalyq ýchaskelerde ózen arnalaryn tazartýdy uiymdastyrý kerektigin aitady.
Sondai-aq, ol jergilikti ákimdikterge kommýnaldyq menshiktegi gidrotehnikalyq qurylystardyń jai-kúiine nazar aýdaryp, kommýnaldyq menshiktegi sý qoimalaryn tasqyn sýlardy qabyldaýǵa daiyndaý qajettigin eske saldy.
