Biyl 6 millionǵa jýyq qazaqstandyq koronavirýsqa qarsy vaktsina qabyldaidy. Bul týraly búgin QR Densaýlyq saqtaý ministrliginiń keńeitilgen alqa otyrysynda vedomstvo basshysy Aleksei Tsoi aitty, dep habarlaidy "Ult aqparat".
«Qazaqstanda jeke vaktsina ázirleýshiler, sondai-aq vaktsina óndirýge arnalǵan oqshaýlanǵan alań bar - bul vaktsinamen qamtamasyz etýge bailanysty táýekelderdi barynsha azaitý jáne respýblikamyzdaǵy epidemiologiialyq ahýaldy turaqtandyrýǵa aitarlyqtai áser etedi. Osylaisha, 2021 jyly biz 6 mln astam adamdy egýdi josparlap otyrmyz», - dedi Aleksei Tsoi.
Sonymen qatar, ministr reseilik «Spýtnik V» vaktsinasy rekordtyq merzimde satyp alynǵanyn eske saldy. Búginde ol Qaraǵandy farmatsevtikalyq kesheniniń bazasynda óndirilýde.
«Otandyq taýardy jetkizý bekitilgen kestege sáikes – biyl 24 aqpanda bastaldy. Sonymen qatar, biyl sáýir aiynda QR BǴM Ǵylym komitetiniń Biologiialyq qaýipsizdik problemalary ǵylymi-zertteý institýty ázirlegen – otandyq «QazCovid-in» vaktsinasyn qoldaný josparlanǵan», - dedi ol.
Onyń aitýynsha, Densaýlyq saqtaý ministrligi profilaktikalyq egýge arnalǵan vaktsinany tasymaldaldaǵanda salqyn jerde saqtaý máseleleri boiynsha standartty operatsiialyq rásimderdi ázirledi jáne bekitti. 2 myńnan astam meditsina qyzmetkerleri KVI-ge qarsy vaktsinatsiia taktikasy, vaktsinatsiianyń qaýipsizdigi men tiimdiligin qamtamasyz etý boiynsha oqytyldy.
