Biyl 37 aýyldyq eldi mekenniń 46 myńǵa jýyq turǵyny taza aýyz sýmen qamtamasyz etiledi. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy QazAqparat.
«Úkimet aldynda aýyldyq eldi mekenderdi 2023 jylǵa deiin 100 paiyz taza aýyz sýmen qamtamasyz etý týraly naqty tapsyrma qoiylǵan. Jalpy bul jumysty Indýstriia jáne infraqurylymdyq damý ministrligi júrgizip jatyr. Biz osy másele boiynsha respýblikalyq menshiktegi toptyq sý qubyrlardy paidalaný men damytýdy qamtamasyz etemiz. Búgingi kúni respýblika boiynsha jalpy uzyndyǵy 15,5 myń shaqyrym bolatyn 74 toptyq sý qubyrlary bar. Onyń 37-si - respýblikalyq menshikte, al qalǵan 37 ákimdikterdiń menshiginde tirkelgen. 2019 jyly Pavlodar oblysynda Mai jáne Belovod toptyq sý qubyrlary, sondai-aq Qaraǵandy oblysynda Jáirem-Qarajal sý qubyrlary paidalanýǵa berildi», - dedi ol Senat tóraǵasynyń orynbasary Asqar Shákirovtiń tóraǵalyǵymen ótip jatqan Úkimet saǵatynda.
Onyń atap ótýinshe, biyl Almaty oblysynda Qaskeleń, Qyzylorda oblysynda Talap jáne Jideli, Soltústik Qazaqstan oblysynda Presnovtiń ekinshi kezegi, Batys Qazaqstan oblysynda Jympity toptyq sý qubyrlary boiynsha jumystar aiaqtalady.
«Nátijesinde 37 aýyldyq eldi mekenniń 46 myńǵa jýyq turǵyny taza aýyz sýmen qamtamasyz etiledi. Budan basqa, 1 qala men 39 aýyldyq eldi mekenniń eski sý berý júiesi qaita jóndeýden ótip, aýyz sýdyń sapasy artady. Óz kezeginde, bul 287 myń turǵyndy qamtidy. Biyl úsh toptyq sý qubyrynyń qurylysy bastaldy. Olar -jańadan salynyp jatqan Aqmola oblysyndaǵy Makinsk pen Aqtóbe oblysyndaǵy Janys bi toptyq sý qubyrlary. Sonymen qatar Qaraǵandy oblysyndaǵy Esqula toptyq sý qubyrynyń jańa bóligi salynýda. Atalǵan toptyq sý qubyrlary 2021 jyly paidalanýǵa beriledi. Nátijesinde 3 aýyldyq eldi mekende turatyn 1,3 myń adam úshin sapaly aýyz sý qoljetimdi bolady», - dedi Maǵzum Myrzalǵaiev.
Sonymen qatar ministr 3 qalany sýmen qamtamasyz etetin qubyrlar jańartylatyndyǵyn, 94 myń turǵyn úshin beriletin aýyz sýdyń sapasy jaqsaratyndyǵyn atap ótti.
