Biyl 285 eldi mekendi sý basý qaýpi bar. Bul týraly QR TJM Tótenshe jaǵdailardyń aldyn alý departamentiniń bastyǵy Rústembek Ámrin aitty, dep habarlaidy QazAqparat.
«Ótken jyly atqarylǵan aldyn alý is-sharalar kesheni jalpy el boiynsha 1 010 eldi mekenniń 158-in qorǵaý deńgeiin arttyrýǵa múmkindik berdi. Bul rette qaýip joiylǵan eldi mekenderdiń sany 340-qa jetti jáne 385 eldi meken úshin barynsha azaityldy. Sý basý qaýpi búgingi kúni 285 eldi mekende saqtalyp otyr», - dedi ol Ortalyq kommýnikatsiialar qyzmetindegi baspasóz máslihatynda.
Departament bastyǵynyń dereginshe, qazirgi ýaqytta tikelei sý tasqyny aldynda ákimdikterdiń eldi mekenderden qar shyǵarý, aryqtar men kanaldardy, avtomobil jáne temirjol sý ótkizý qurylystaryn muz ben qoqystan tazartý, inertti materialdar qoryn daiyndaý boiynsha jumystary jalǵasýda.
«Búgingi tańda eldi mekenderden 5 million tekshe metrden astam qar shyǵaryldy. 4 myńnan astam kanal men 5 myńǵa jýyq aryq, 4 myńnan astam avtomobil jáne 2 myń temirjol sý ótkizý qurylystary tazartyldy. 200 myń tonnadan astam inertti materialdar daiyndaldy. Halyqpen 8 myńǵa jýyq jiyn ótkizildi. Sý tasqyny kezindegi is-áreket erejeleri bar 40 myńnan astam usynymdar taratyldy», - dedi Rústembek Ámrin.
