Aǵymdaǵy jyly elimizde kolledjde oqityn stýdentter sany 105 myń adamǵa jetedi. Bul týraly búgin Úkimettiń selektorlyq rejimdegi otyrysynda QR Bilim jáne ǵylym ministri Erlan Saǵadiev málim etti, dep habarlaidy QazAqparat.
Saǵadievtiń aitýynsha, Bilim jáne ǵylym ministrligi Nátijeli jumyspen qamtý jáne jappai kásipkerlikti damytý baǵdarlamasy aiasynda tehnikalyq jáne kásiptik kadrlardy daiyndaýmen ainalysýda.
«Ol bizdiń 9-11 synyptardy biyl bitiretin jáne byltyrǵy jyldary bitirgen balalarǵa arnalǵan 2-3 jyldyq standart boiynsha kolledjde ótetin baǵdarlamasy. Bizde jyl saiyn 85 myń bala kolledjderge tússe, biylǵy jyly qosymsha 20 myń bala osy joba arqyly kelip, 105 myńǵa jetemiz dep otyrmyz. Bizde jyl saiyn 20-25 myń bala kolledjge, joǵary oqý oryndaryna túspei, mamandyqsyz qalady. Osy joba sol balalarǵa arnalǵan. Biyl qosymsha 4,3 mlrd. teńge bólinip, jergilikti biýdjetterge jiberildi», - dedi ol.
Onyń atap ótýinshe, oblystarda 825 mobildi toptar quryldy. Olar kadrlardy daiyndaýǵa adamdar tizimin jinaqtap otyr. Batys Qazaqstan oblysynan basqa ár oblysta bilim uiymdary jáne mamandyqtar tizbesin bekitý úshin óńirlik komissiialar quryldy. 360 tehnikalyq jáne kásiptik uiymdardyń tizbesi anyqtaldy. Jergilikti organdar boljamdyq usynys negizinde jumysshy kadrlar úshin kásipter tizbesin daiyndaýda.
«Oqytý baǵdarlamalary daiyn. Oblystyq kásipkerler palatasymen kelisip bekitildi. Osy baǵdarlama arqyly oqýǵa túsetin balalar shákirtaqymen, bir rettik ystyq tamaqpen jáne tegin jatyn orynmen qamtamasyz etiledi», - dedi ministr.
.jpeg)