Biyl 10 máiittiń aǵzasy 50 qazaqstandyqtyń ómirin uzartty. Bul týraly belgili hirýrg Jaqsylyq Dosqaliev aitty, dep habarlaidy "Ult aqparat".
«Búginde elimizde 2800-den astam adam búirek translantatsiiasyn qajet etedi. Olardyń sany kúnnen-kúnge kóbeie túsýde. Oǵan jete almai dúnieden ozyp jatqandary da bar. Baýyr transplantatsiiasyn kútip otyrǵan adam sany 500-ge jýyqtaidy. Júrekke 110 adam, ókpege 15 shaqty adam táýeldi bolyp otyr. Bul naýqastardyń ózi ǵana emes janyndaǵy otbasy, týǵan-týystary kúndiz kúlkiden, túnde uiqydan airylyp otyrǵanyn túsinýimiz kerek. Biz olarǵa kómek kórsetýge daiynbyz. Úkimet tarapynan barlyǵy, qarajaty da daiyn tur. Endi zań júzinde qabyldasaq, alǵa qarai ilgeriler edik», - dedi tanymal hirýrg Halyq densaýlyǵy kodeksiniń jańa nusqasy talqylaýǵa arnalǵan keńes aiasynda bergen suhbatynda.
Onyń aitýynsha, Qazaqstanda aǵzany tiri adamnan da, máiitten de alýǵa bolady. Biraq, aǵza salynatyn adamnyń organizmimen tolyq sai kelýi tiis.
«Osy jyldyń 11 aiynda 10 máiitten aǵza alyndy. Ár máiitten 5 músheden alynyp, 50 adamnyń ómiri uzardy. Muny ary qarai damytýymyz kerek. Bizde adam ólgennen keiin onyń aǵzasy jer qoinyna tolyq jerlenýi tiis degen túsinik bar. Menińshe, bul qate uǵym. Kóp bolsa jer astynda sol máiit 5 jyldai ǵana bolyp, odan keiin buzylady. Tek súiegi qalady. Sony túsinýimiz qajet», - dedi ol.
Jaqsylyq Dosqalievtiń dereginshe, álemde damyǵan elderdiń ishinde Ispaniiada aǵza transplantalogiiasy birshama jaqsy damyǵan.
«Bul elde bir million adamǵa 14, bizde 0,06 adam ǵana. Iaǵni, joqtyń qasy. Al elimizde 4 myńnan astam adam aǵza transplantatsiiasyna muqtaj bolyp otyr», - dedi J.Dosqaliev.
Aita keteiik, elordadaǵy Astana meditsina ýniversitetinde QR Densaýlyq saqtaý ministri Eljan Birtanov Halyq densaýlyǵy kodeksiniń jańa nusqasy talqylaýǵa arnalǵan kezdesý ótkizip jatyr.
