2020 jyldyń sońyna deiin 1000-nan astam aýyl jyldamdyǵy joǵary mobildi internetpen qamtylady.
Bul jaiynda QR Tsifrlyq damý, innovatsiia jáne aeroǵarysh ónerkásibi ministri Asqar Jumaǵaliev Facebook paraqshasynda jazdy, dep habarlaidy "Ult aqparat".
«Bailanys operatorlarymen ótkizgen birqatar kezdesýlerdiń nátijesinde mańyzdy qujatqa qol qoidyq. Turǵyn sany 250 jáne odan da kóp aýyldarǵa joǵary jyldamdyqty mobildi internetti júrgizýdiń jospar-kestesin quryp, ony barlyq óńirlermen kelistik. Elimiz úshin mańyzy zor jobany operatorlar óz qarajaty esebinen iske asyrady. Bul aýyl turǵyndary sapaly mobildi internetpen qatar, elektrondyq qyzmetterdi, qashyqtyqtan oqytý jáne taǵy basqaralaryn paidalaný múmkindigine ie bolady degen sóz. Elbasy jáne el Prezidenti eldi mekenderdi sapaly bailanys qyzmetterimen qamtý jóninde tapsyrma berdi. Bul mindettiń «Nur Otan» partiiasynyń sailaýaldy baǵdarlamasyna engenin ózderińiz bilesizder», - dep jazdy ministr.
Onyń atap ótýinshe, osy jobany júzege asyrý úshin «Qazaqtelekom» AQ, «Ksell» AQ», «Mobail telekom-servis» JShS jáne Kar-Tel» JShS memorandýmǵa qol qoidy.
«Bailanys operatorlary aýyldyq eldi mekenderdi mobildi bailanyspen jáne internetpen qamtamasyz etý úshin jelilerdi birlesip qurýǵa jáne jiilikterdi paidalanýǵa ýaǵdalasty. Jaýapty mindet úshin kúsh-jiger biriktirý - óte durys sheshim dep oilaimyn. Operatorlar jobanyń kartasyn jaqyn arada jasaýǵa ýáde berdi. Kartanyń kómegimen jobanyń júzege asyrylýyn qadaǵalai alamyz», - dedi Asqar Jumaǵaliev.
