2026 jylǵy 1 maýsymdaǵy jaǵdai boiynsha respýblikalyq biýdjetke túsken túsim kólemi 9,4 trln teńgeni qurady. Bul týraly Qarjy ministrligi málimdedi, dep habarlaidy ult.kz.
Vedomstvonyń málimetinshe, transfertterdi esepke almaǵandaǵy biýdjet kiristeri 7,4 trln teńgege jetip, esepti kezeń jospary 100,9 paiyzǵa oryndalǵan.
Salyqtyq túsimder kólemi 7,2 trln teńgeni nemese jospardyń 100,5 paiyzyn qurady. Nátijesinde jospar 38,6 mlrd teńgege asyra oryndalǵan. Al salyqtyq emes túsimder 166,2 mlrd teńgege jetip, jospardyń 120,1 paiyzyna oryndaldy. Jospardan tys túsken qarajat kólemi 27,9 mlrd teńgeni quraǵan.
Sonymen qatar respýblikalyq biýdjetke Ulttyq qordan 1,4 trln teńge kóleminde kepildendirilgen transfert tartyldy.
Qarjy ministrliginiń deregine sáikes, esepti kezeńde respýblikalyq biýdjet shyǵystary 11,1 trln teńgeni qurap, jospar 97,4 paiyzǵa oryndalǵan.
Osynyń nátijesinde respýblikalyq biýdjet tapshylyǵy 1,7 trln teńge nemese jalpy ishki ónimniń 0,9 paiyzy deńgeiinde qalyptasty.
Sondai-aq nysanaly transfertter aiasynda óńirlerge 187,4 mlrd teńge bólinip, onyń 174,5 mlrd teńgesi igerilgen.
Qarjy ministrligi jalpy alǵanda respýblikalyq biýdjettiń kiris bóliginiń oryndalýy josparly deńgeiden joǵary saqtalǵanyn jáne óńirlerdi qarjylandyrý tolyq kólemde qamtamasyz etilgenin atap ótti.
