Teginde bala júregine izgilik pen bilimniń nárin egip, mamandyǵyn maqtanyshqa ainaldyra bilgen ustazda arman joq. Kózi tirisinde-aq «Han apa», «Qazaqtyń Qanipasy» atanǵan Qanipa Omarǵaliqyzy Bitibaeva sondai ustazdardyń sanatynan bolatyn. Mine, úlken júrekti ustazdyń aramyzdan ketkenine de eki jyldyń júzi bolypty. Biraq ulaǵatty ustazdyń ekinshi ǵumyry endi ǵana bastalǵandai. Óskemendegi daryndy balalarǵa arnalǵan Jambyl atyndaǵy mamandandyrylǵan mektep-gimnaziia-internatynda Bitibaevanyń óńiraralyq pedagogikalyq oqýlary bolyp ótti.
Oblystyq bilim basqarmasy men «Shyǵys» óńirlik ortalyǵynyń uiytqy bolýymen «Zamanaýi bilim berýde Qanipa Bitibaevanyń innovatsiialyq tehnologiiasy men pedagogikalyq taǵylymy» atty taqyrypta alǵash ret ótip otyrǵan Bitibaevanyń pedagogikalyq oqýlaryna Almaty, Qaraǵandy, Pavlodar oblystarynan arnaiy kelgen qazaq tili men ádebieti pániniń muǵalimderi, oblystyq bilim basqarmalarynyń mamandary, oblystyń barlyq bilim berý uiymdarynyń gýmanitarlyq pánder muǵalimderi, Óskemen qalasy gýmanitarlyq kolledji men Semeidegi M.Áýezov atyndaǵy pedagogikalyq kolledj oqytýshylary qatysty. Kelgen qonaqtar eń aldymen Q.Bitibaeva atyndaǵy oblystyq oqý-ádistemelik murajaimen tanysyp, atalǵan mekteptiń 6 «a», 6 «b» synyptaryndaǵy «Tulǵasy biik, taǵylymy máńgi uly ustaz», «Shabytyma qanat berdiń sharq urǵan...» atty synyp sabaqtary men Bitibaeva zerthanasynda júrgizilgen «Oǵyz qaǵan jyry» boiynsha onlain júiesinde ótken Bitibaeva sabaqtaryna qatysty.
Sondai-aq, Bitibaevanyń óńiraralyq pedagogikalyq oqýlaryna qatysýshylar halyqaralyq, respýblikalyq, mektepishilik ǵylymi jobalar, olimpiada júldegerleriniń jumystary qoiylǵan arnaiy kórmeni de tamashalap, ulaǵatty ustaz eńbek etken mekteptiń jetistikterine qanyqty. Daryndy balalarǵa arnalǵan Jambyl atyndaǵy mamandandyrylǵan mektep-gimnaziia-internatynyń oqýshylary ázirlegen «Ańyz ustaz» atty sahnalyq kórinis te qonaqtardyń kóńilderinen shyqty.
Sharaǵa qatysýshylardy oblystyq bilim basqarmasy basshysynyń orynbasary Ainur Sultanova quttyqtap, jyly lebizin bildirdi.
- Qanipa Omarǵaliqyzy sanaly ǵumyryn ustazdyqtyń ulaǵatty jolyna arnady. Týǵan halqynyń asyl sózin, muralaryn shákirtteriniń sanasyna uialatyp, uly Abai men Muhtardyń ulylyǵyn dáriptedi. Qanipa Bitibaeva - qazaq pedagogikasyndaǵy teńdesi joq erekshe qubylys. Ol qazaq ádebietin oqytý ádistemesin, tehnologiiasyn damytýǵa airyqsha úles qosty. Belgili ǵalymdar Á.Qońyratbaev, Kóshimbaevtardan keiin «Qazaq ádebietin oqytý ádistemesi» atty joǵary oqý oryndaryna arnalǵan oqýlyq jazdy. Respýblikamyzda tuńǵysh ret Abai, Muhtar shyǵarmalaryn mektepte oqytýǵa arnalǵan irgeli eńbekter elimizdiń túkpir-túkpirindegi ustazdardyń suranysyna ie boldy, - degen Ainur Oralqyzy búginde oblysta Qanipa Bitibaeva zerthanasynyń sany artyp otyrǵanyn, Tarbaǵatai, Abai, Shemonaiha, Zyrian, Jarma aýdandarynda da jańadan zerthana bólimsheleri ashylǵanyn jetkizdi. Uly ustazdyń eńbek etken qara shańyraǵynda Qanipa Bitibaeva atyndaǵy oqý-ádistemelik murajaiy ashylyp, oblys ustazdary men mektep oqýshylary úshin qyzmet etýde. Jylma-jyl Qanipa Bitibaeva atyndaǵy olimpiada dástúrli túrde ótkizilip keledi. Aldaǵy ýaqytta Qanipa Bitibaeva atyndaǵy zerthanalar bir-birimen onlain júiesinde sabaqtar ótkizip, sheberlik synyptar kórsetip, tájiribe almasatyn bolady.
Qanipa Bitibaeva - uly Abai, Muhtardyń shyǵarmalaryn mektepte oqytý máselesine bailanysty qundy eńbekter jazǵan ustaz. Abaidyń, Muhtardyń eńbekterin mektep oqýshylaryna qalai oqytý kerek? Nárin, sólin bala boiyna qalai sińirý qajet? Sharanyń plenarlyq bóliminde bul taqyrypta S.Amanjolov atyndaǵy ShQMÝ-dyń Biliktilikti arttyrý ortalyǵynyń direktory Baqytjan Kelgenbaeva «Qanipa Bitibaevanyń M.Áýezov shyǵarmashylyǵyn oqytý jaily eńbeginiń ǵylymi-praktikalyq qundylyǵy» taqyrybynda baiandama jasady.
- Ulaǵatty ustaz, kórnekti pedagog, halyqtyń aiaýly qyzy Qanipa Omarǵaliqyzy Bitibaevanyń ǵylymi-ádistemelik muraty – tól pedagogikamyz ben ádebiettanýdyń eńsesin biikke kóterip, muǵalimder men stýdentter qaýymynyń oi-órisin keńeitip, tájiribesin ushtaý bolatyn. Qanipa Omarǵaliqyzy - qazaq ádebietin oqytýdyń innovatsiialyq tehnologiiasyn tól izdenisterimen damytyp, ejelgi dáýir ádebietinen qazirgi qazaq ádebietine deiin oqytý ádistemesin jazyp shyqqan ǵalym-ustaz edi. Ǵalym-ustaz M.Áýezovtiń ádebi murasyn oqytý máselesine «Ádebietti oqytýdyń tiimdi joldary» (1991), «Muhtar Áýezov shyǵarmashylyǵyn oqytý» (1994), «M.Áýezov týyndylaryn mektepte oqytý» (2002) atty kitaptar jazyp, áýezovtaný ilimine qomaqty úles qosty. Burynǵy avtorlar jazýshy murasyn jekelegen taqyryptar aiasynda oqytý máselesin qarastyrsa, ustazdyń M.Áýezov shyǵarmalaryn oqytýǵa arnalǵan osy úsh eńbegi uly jazýshy shyǵarmalaryn tutastai oqytýǵa arnalǵan alǵashqy eńbekter edi, - deidi ol.
Al «Qanipa Bitibaevanyń jańashyl ádistemesi – oqytýdyń ónimdi joly» atty taqyrypta baiandama jasaǵan Almaty oblystyq bilim basqarmasy ádistemelik kabinetiniń innovatsiia jáne orta bilim bóliminiń jetekshisi Sherizat Saparǵalieva oqytý úrdisine ulttyq biryńǵai testileý júiesi engizilgennen bergi ýaqyt ishinde ádebiet jalań málimetter jiyntyǵyna ainalyp, óz máninen aiyryla bastaǵanyn, oqýshylar arasynda kórkem ádebietke degen qyzyǵýshylyqtyń tómendep ketkenin jasyrmady. Dál osy kezde oqýshylardyń fýnktsionaldyq saýattylyǵyn damytý jónindegi ulttyq is-qimyl jospary dúniege keldi. Dese de Qanipa Omarǵaliqyzy fýnktsionaldyq saýattylyq týraly sóz qozǵalmai turǵan sonaý alpysynshy jyldardyń ózinde-aq osy máseleni kótergen kórinedi. Búgingi kúni Qanipa Bitibaevanyń eńbekteri ádebietti oqytýdyń ádistemelik ǵylymynda úlken oryn alady.
Osy oraida almatylyq meiman Qanipa Bitibaevanyń jinaqtalǵan, jańartylǵan ádistemelik quraldary búkil respýblika muǵalimderine qoljetimdi bolýy úshin Bitibaevanyń ádistemesine arnalǵan jeke sait ashylsa, respýblika muǵalimderiniń barlyǵy birkisidei atsalysyp, Bitibaeva atyndaǵy qor qursa, Bitibaeva ádistemesine arnalǵan jeke basylym jaryq kórse, sonymen qatar til mamandaryna arnalǵan Bitibaeva atyndaǵy júlde, tósbelgi taǵaiyndalsa degen usynystaryn da jetkizdi.
2009 jyly Bilim jáne ǵylym ministrliginiń arnaiy buiryǵymen Q.Bitibaevanyń kabineti respýblikalyq ǵylymi-ádistemelik zerthana bolyp quryldy. Keiinnen 2011 jyly Q.Bitibaeva zerthanasy Astana qalasyndaǵy №64 mektepte de ashylady. Sharada osy zerthananyń jetekshisi Altyngúl Shotbaeva «Zamanaýi bilim berýde Qanipa Bitibaevanyń innovatsiialyq tehnologiiasy men pedagogikalyq taǵylymy» taqyrybynda baiandama jasap, ulaǵatty ustazdyń oqýshynyń bilim deńgeiin shyǵarmashylyq deńgeige kóterý joldaryn usynǵanyn, ǵalym-ustazdyń, ásirese, «Oi tastaý, oilantý, oilaý» tehnologiiasy oqýshynyń óz eńbegimen bilimdi alýǵa jaǵdai jasap, shyǵarmashylyq qabiletin jetildirýge, óziniń ishki múmkindikterin tanýǵa jeteleitinin aitty.
Sharada ustazdyń tárbiesin kórip, tálimin alǵan shákirtteri de sóz alyp, ádemi estelikterdiń tiegin aǵytty. Solardyń biri - abaitanýshy ǵalym Aijan Qartaeva.
- Qanipa apai eki sózdiń basyn qosa almai, shyǵarma jaza almai kelgen balalardy aqyn, jazýshy, sózge sheshen etip shyǵaratyn edi,- deidi ol.
Óskemendegi daryndy balalarǵa arnalǵan Jambyl atyndaǵy oblystyq mamandandyrylǵan mektep-gimnaziia-internatyndaǵy Q.Bitibaeva ataýly zerthanasynyń jetekshisi Merýert Muqasheva da Q.Bitibaevanyń shákirti. Ol Qanipa apaidyń kózi tirisinde ashylǵan respýblikalyq ǵylymi-ádistemelik zerthanasynyń búgingi jumystary jaiynda jinalǵandarǵa baiandap berdi.
-Zerthana búgingi kúni respýblika kólemindegi ǵylymi-zertteý, oqý-ádistemelik, tájiribelik alańǵa ainalyp otyr. Q.Bitibaevanyń búgingi óńiraralyq pedagogikalyq oqýlary – ustazdyń is-tájiribesiniń jalǵasyn taýyp jatqandyǵynyń, ómirsheńdiginiń dáleli, - deidi M.Muqasheva.
Pedagogikalyq oqýlardyń barysynda «Q.Bitibaeva jáne qazaq tili men ádebietiniń ózekti máseleleri», «Qazaq tili men ádebietin oqytýda Q.Bitibaevanyń innovatsiialyq tehnologiiasy», «Q.Bitibaevanyń pedagogikalyq murasy jáne gýmanitarlyq ǵylymdardy oqytý» taqyryptarynda sektsiialar jumys jasap, úzdikter anyqtalyp, júldegerlerge diplomdar, al qatysýshylarǵa sertifikattar tabys etildi.
- Osydan on jyldam astam ýaqyt buryn, 2005 jyly Óskemenge kelip, Qanipa apaidyń avtorlyq kýrsyna qatysyp edim. Talai aqyl-keńesin tyńdadym, birlese jumys istedik. Tipti «Shoqan Ýálihanovtyń eńbekterindegi etnografiialyq ataýlar» atty eńbegimdi oqyp «Láilasy bar mektep - shamshyraǵy bar mektep» dep retsenziia jazyp bergeni de esimde. Búgingi Bitibaevanyń pedagogikalyq oqýlaryna qatysqanyma sheksiz baqyttymyn, - deidi Kúrshim aýdany Qaljyr orta mektebiniń qazaq tili men ádebieti pániniń muǵalimi Láila Jumahanova.
Uiymdastyrýshylardyń aitýynsha, atalǵan shara endi úsh jylda bir ret ótkizilip turatyn bolady.
Meiramtai Imanǵali, "Didar" gazeti
