Qyrǵyzstan densaýlyq saqtaý ministrligi Bishkekte miting kezinde 700-ge jýyq adamnyń zardap shekkenin habarlady. Dáriger kómegine júgingen 686 adamnyń 521-i alǵashqy kómek kórsetilgennen keiin ambýlatorlyq jaǵdaida emdelýge jiberilgen.
Túrli dárejede jaraqat alǵan 164 adam aýrýhanaǵa jatqyzylǵan. 7 adam reanimatsiiada jatyr. Osyǵan deiin 2001 jylǵy er adamnyń ulttyq gospitalda aýyr jaraqattan kóz jumǵany habarlanǵan edi.
5 qazanda Bishkekte parlament sailaýynyń qorytyndysymen kelispegen narazy top miting ótkizip, sailaý nátijesin joiýdy talap etken.
Dúisenbi kúni keshke qarai demonstranttar Aq úidiń ońtústik qaqpasyn syndyryp, ishke enýge tyrysqan. Militsiia arnaiy quraldar qoldanyp, narazylardy taratpaq boldy.
Bastapqyda kúshtik qurylymdar demonstranttardy Aq úi men "Ala-Too" alańynan qýǵan. Keibir kóshelerde demonstranttar men quqyq qorǵaý organ ókilderi qaqtyǵysyp qalǵan. Jarym túnde narazylar Aq úi, memlekettik ulttyq qaýipsizdik komiteti ǵimaratyn, qoǵamdyq KTRK arnasyn basyp aldy.
6 qazanda prezident Sooronbai Jeenbekov ortalyq sailaý komissiiasyna sailaý kezinde bolǵan zańbuzýshylyqtardy tekserýdi tapsyryp, "qajet jaǵdaida sailaý qorytyndysyn joiýdy" usynǵan. Kóp keshikpei ortalyq sailaý komissiiasynyń parlament sailaýynyń nátijesin joiǵany belgili boldy.
Elde úilestirý keńesi qurylyp, oǵan birqatar saiasatkerler endi. "Býtýn Kyrgyzstan" partiiasynyń jetekshisi Adahan Madýmarov keńes jetekshisi bolyp taǵaiyndaldy.
