Foto: Gov.kz
Memleket basshysy Qasym-Jomart Toqaevtyń Qyrǵyz Respýblikasyna resmi sapary aiasynda Bishkek qalasynda III qazaq-qyrǵyz ónerli jastar forýmy uiymdastyryldy. Biyl forým shyǵarmashyl jastar arasyndaǵy tsifrlyq jáne innovatsiialyq yntymaqtastyqty damytýǵa arnaldy, dep habarlaidy Ult.kz.
Jiyn qos halyqtyń tarihy men mádenietin zertteýdegi Shoqan Ýálihanovtyń eńbegi týraly «Chokan Valihanov: taryhtyn jaryk jyldyzy» atty derekti filminiń tusaýkeserinen bastaldy.
Is-sharaǵa Qazaqstan Respýblikasynyń Mádeniet jáne aqparat ministri Aida Balaeva, Qyrǵyz Respýblikasynyń Memlekettik hatshysy Marat Imanqulov, sondai-aq eki eldiń mádeniet, ǵylym jáne shyǵarmashylyq salasynyń ókilderi men ziialy qaýym qatysty.
Aida Balaeva Shoqan Ýálihanov eńbekteriniń qazaq-qyrǵyz tarihyndaǵy ornyn erekshe atap ótti.
«Álemge áigili «Manas» dastany qyrǵyz ultynyń boitumary bolsa, ony alǵash ret qaǵazǵa túsirip, kópke nasihattaýda Shoqan Ýálihanovtyń eńbegi zor. Sondai-aq onyń «Ystyqkól kúndeligin» – qazaq-qyrǵyz birliginiń ǵylym men rýhaniiattaǵy jarqyn kórinisi. Qyrǵyz baýyrlarymyz túsirgen búgingi «Chokan Valihanov: taryhtyn jaryk jyldyzy» derekti filmi tarihi ári mádeni qundylyǵy zor, maǵynaly týyndy bolady dep senemin», - dedi ministr.
Qyrǵyz Respýblikasynyń Memlekettik hatshysy Marat Imanqulov eki elge ortaq tarihi tulǵalardyń mańyzyna toqtaldy.
«Qyrǵyzstan men Qazaqstan tarihynda Abai Qunanbaev, Shoqan Ýálihanov, Jambyl Jabaev, Muhtar Áýezov, Shyńǵys Aitmatov syndy uly tulǵalar bar. Olar mádeni jáne rýhani dástúrler arqyly qos halyqtyń birligi men baýyrlastyǵyna zor úles qosty. Dál osy qairatkerler búgingi jastarǵa shabyt berip, olardy jasampazdyq jolyn jalǵastyrýǵa jetelep keledi», – dedi ol.
Forým aiasynda Qazaqstan Respýblikasynyń Mádeniet jáne aqparat ministri Aida Balaeva Qyrǵyz Respýblikasynyń mádeniet, aqparat jáne jastar saiasaty ministri Mirbek Mambetalievpen kezdesip, mádeni-gýmanitarlyq áriptestikti damytý máselelerin talqylady.
Budan bólek, forým kretivti indýstriia men tsifrlandyrý máselelerine nazar aýdardy. «Jańa býyn AI-startaptary: jergilikti ideiadan jahandyq naryqqa» jáne «Ed-tech jobalary: jańa syn-qaterler» taqyryptarynda paneldik sessiialar ótkizildi. Oǵan 300-den astam jas IT-kásipkerler, startapshylar, baǵdarlamashylar, blogerler men media mamandar qatysty.
