Aqmola oblysynyń Qorǵaljyn aýdanynda mal sharýashylyǵyna qaitarymsyz qarjy almaq bolǵan áiel internet-alaiaqtardyń qurbany boldy. Alaiaqtar oǵan 5 million teńge ýáde etip, 2 million teńgeden astam shyǵynǵa batyrǵan, dep habarlaidy ult.kz.
Politsiia málimetinshe, 25 qyrkúiekte áiel Instagram jelisinen mal sharýashylyǵyn damytýǵa qarjylai kómek berý týraly habarlandyrý kórgen. Keiin ózin qarjylyq keńesshi retinde tanystyrǵan adam onymen bailanysqa shyqqan.
Alaiaq áielge ýáde etilgen aqshany alý úshin banktik qosymsha arqyly 2 million teńgege taýarlyq nesie rásimdeý keregin aitqan. Senip qalǵan turǵyn qaryz alyp, qarajatty belgisiz shottarǵa aýdarǵan. Alaida ýáde etilgen 5 million teńge oǵan berilmegen.
Qazir atalǵan fakti boiynsha politsiia tergeý júrgizip jatyr.
Quqyq qorǵaý organdary azamattardy áleýmettik jelidegi kúmándi usynystarǵa senbeýge, beitanys adamdardyń nusqaýymen nesie rásimdemeýge jáne belgisiz shottarǵa aqsha aýdarmaýǵa shaqyrady.
