Qyrǵyzstan prezidenti Sooronbai Jeenbekov búgin, 9 qazanda Bishkek qalasynyń aýmaǵynda tótenshe jaǵdai rejimin engizý týraly jarlyqqa qol qoidy, dep habarlaidy Kabar agenttigi.
"Jappai tártipsizdikter nátijesinde týyndaǵan zorlyq-zombylyqpen jáne adamdardyń ómiri men densaýlyǵyna qater tóndirýmen ushtasatyn qalyptasqan jaǵdaiǵa bailanysty, sondai-aq Qyrǵyz Respýblikasy Konstitýtsiiasynyń 15-babyna, 64-baby 9-bóliginiń 2-tarmaǵyna jáne «Tótenshe jaǵdai týraly» Qyrǵyz Respýblikasy Konstitýtsiialyq Zańynyń 3, 4, 7, 8-baptaryna sáikes azamattardyń ómiri men densaýlyǵyn, olardyń qaýipsizdigin qorǵaýdy qamtamasyz etý múddesinde, budan bólek, Bishkek qalasynyń aýmaǵynda qoǵamdyq tártipti qamtamasyz etý maqsatynda:
Qyrǵyz Respýblikasy Bishkek qalasynyń aýmaǵynda 2020 jylǵy 9 qazan saǵat 20.00-den 2020 jylǵy 21 qazan saǵat 08.00-ge deiin tótenshe jaǵdai engiziledi.
Qyrǵyz Respýblikasy Ishki ister ministriniń orynbasary Almazbek Qydyrbaiuly Orozaliev Bishkek qalasynyń tótenshe jaǵdai kezeńindegi komendanty bolyp taǵaiyndaldy.
Qyrǵyz Respýblikasy Bishkek qalasynyń aýmaǵynda tótenshe jaǵdai rejimin qamtamasyz etý úshin komendatýra qurylyp, Bishkek qalasynyń komendatýrasy týraly ereje qosymshaǵa sáikes bekitildi" delingen qujatta.
Osy aralyqta qalaǵa kirip-shyǵýǵa shekteý qoiylady, ereýil, jinalys, sherý, demonstratsiia jáne piket ótkizýge tyiym salynady. Kásiporyndardyń jumys isteý ýaqyty ózgeredi. Adam kóp júrgen jerde saqshylar jinalǵandardyń kujattaryn tekseredi. Qujatta budan da basqa shekteý sharalary jazylǵan.
Qyrǵyzstanda 4 qazanda ótken parlament sailaýynan keiin saiasi daǵdarys týyndaǵan. Parlament sailaýynyń nátijesin joiýdy talap etken narazylyq aktsiialarynyń sońy tártipsizdikke ulasqan. 6 qazanǵa qaraǵan túni demonstranttar parlament pen prezident apparaty ornalasqan "Aq úidi" basyp aldy. Jemqorlyq boiynsha aiyptalyp, sottalǵan birneshe saiasatker narazylar talabymen qamaýdan shyqty. Elde saiasi kúshter arasynda bilikke talas qyzǵan.
Birneshe kúnnen beri túrli saiasi kúshter men sarapshylar "memleketti quqyqtyq aiaǵa ákelý" joldaryn usynyp jatyr. Prezident Sooronbai Jeenbekov 8 qazan keshke "memleket quqyqtyq aiaǵa oralǵan soń prezident qyzmetinen ketýge daiarmyn" dep málimdegen.
Juma, 9 qazanda kúndiz Bishkekte Ala-Too alańynda eki túrli miting ótti. BAQ-tyń habarlaýynsha, alańnyń bir jaǵyna burynǵy prezident Almazbek Atambaev pen eks-premer Ómirbek Babanov jaqtastary, ekinshi jaǵyna burynǵy depýtat Sadyr Japarov jaqtastary jinalǵan.
