"25 qazanda Bishkek ýaqyty boiynsha tús kezinde Qazaqstan men Qyrǵyzstan shekarasyndaǵy "Aq-Tilek" tekserý jáne ótkizý beketinde 500-ge jýyq júk kóligi jinalyp tur", - dep habarlady Qyrǵyzstannyń memlekettik shekara qyzmetine silteme jasaǵan Azattyqtyń Qyrǵyz redaktsiiasy.
Shekara qyzmetiniń málimetinshe, "Aq-Jol" beketinde jergilikti ýaqyt boiynsha saǵat 12-de 47 jeńil kólik pen júk kóligi jinalyp qalǵan. Adamdar shekaradan erkin ótip jatyr. Talas oblysyndaǵy "Choń-Kapka" beketinde 70-tei kólik kezekte tur. Qalǵan baqylaý jáne ótkizý beketterinde kezek baiqalmaidy. Qyrǵyzstan shekara qyzmeti shekaradaǵy jaǵdai týraly málimetti ár úsh saǵat saiyn alatynyn aitady.
10 qazannan bastap Qazaqstan taraby qyrǵyz shekarasynan azamattar men kólikterdi ótkizý tártibin kúsheitken. Sonyń saldarynan Qyrǵyzstannyń Chý jáne Talas oblystaryndaǵy baqylaý-ótkizý beketterinde adamdar men avtokólikter jinalyp, uzaq ýaqyt kezekte turýǵa májbúr bolǵan. Ásirese tez buzylatyn taǵam ónimderin tasityn úlken júk kólikteriniń júrgizýshileri qatty ziian shekken.
18 qazanda Astanada ótken kelissózder barysynda eki eldiń úkimet jetekshileri kelesi kúnnen bastap jolaýshy kólikteri men júgi bar adamdardy shekaradan ótkizýdi jeńildetý týraly ýaǵdalasqan. Keiinirek Qyrǵyzstan premer-ministriniń birinshi orynbasary Tolkýnbek Abdygýlov delegatsiianyń bir bóligi kelissózderdi jalǵastyrý úshin Astanada qalǵany týraly habarlaǵan.
25 qazanda Erevanda Qazaqstan premer-ministri Baqytjan Saǵyntaev pen Qyrǵyzstan premer-ministri Sapar Isakovpen kezdesken. Keibir aqparattarǵa qaraǵanda, taraptar kelissózde yntymaqtastyq pen jol kartasy jobasyn talqylaǵan.
