Memlekettiń milliard teńgesin jep, milliondap para aldy dep aiyptalǵan eks-ministr Qýandyq Bishimbaevtyń ata-anasy jalǵyz uldaryn esh jaman atqa qimaidy. Jemqorlyqqa qarsy ulttyq biýro jiyrma kúdikti kinálaryn moiyndady dese de, Qýandyqtyń anasy "ulymyzǵa tergeýshiler qysym kórsetti" dep kózine jas alyp otyr, dep habarlaidy «31 arna».
Úlken tragediiany basynan ótkizip otyrǵan otbasy jan jarasymen bólisip, 23 adam sottalyp jatqan qylmystyq istiń artynda tur dep esepteitin adamdardyń da attaryn atap berdi. Eks-ministrge taǵylǵan barlyq aiyptardy eskere otyryp, «31 arna» tilshisi Gúlbaný Ániiatqyzy ata-anasynan ekskliýzivti suhbat aldy.
Qýandyq Bishimbaev Ulttyq ekonomika ministri bolǵan tusta isti bolyp, tergeý abaqtysyna qamaýǵa alynǵan 10 aidan beri kúndiz kúlkiden, túnde uiqydan aiyrylǵan ata-anasy arna tilshisine suhbat berýge uzaq oilanyp baryp kelisti. Jalǵyz uldarynyń isine qatysty erteń bastalatyn sot aldynda bizben Astanadaǵy tynysh kafelerdiń birinde kezdesti. Aita keteiik, eks-ministr Qýandyq Bishimbaevqa 7 bólip, 346 million teńge para aldy jáne Qyzylordadaǵy áinek zaýytynyń qurylysyna bólingen 1 milliard 200 million teńgeni jymqyrdy degen aiyptar taǵylǵan. Ulttyq biýronyń málimetinshe, «Bolashaqtyń» túlegi bul iske qaramaǵyndaǵylarmen birge týǵan bólesin de tartqan. Osy is boiynsha aiyptalǵan 23 kúdiktiniń 20-sy kinásin moiyndasa, Bishimbaev bastaǵan úsheýi ǵana kelispei otyr.
Kinálaryn moiyndaǵandar arasynda «Báiterek–Development» basshysy bolǵan Baqyt Jaqsybaev, onyń burynǵy orynbasary, Májilis depýtaty Qabibolla Jaqypovtyń uly Aslan Jaqypov bastaǵan 20 adam bar.
“Ulymdy túrmege japqan soń basqasha sairap shyǵady. Qýandyqqa qatysty aqsha jaily aita bastaidy”, – deidi anasy almira Nurlybekova.
Al, aiybyn moiyndaýdan bas tartqan Bishimbaevqa tergeý abaqtysynda ailap psihologiialyq qysym kórsetildi deidi. Eks-ministr adam zorlaǵan kúdiktimen birge jatyp, tańǵy 6-dan túngi 10-ǵa deiin tar bólmede jatpaq túgili, otyrýǵa bolmaityn abaqty azabyn da tartqan. Álpeshtep ósirgen jalǵyz balasynyń jaiyn aitqanda anasy kóz jasyn toqtata almady.
“Áke-shesheń bolmaidy, qaitys bolyp ketedi. Áieliń ketip qalady. Balalaryń ósip ketedi. Sondai qatty sózderdi aitqan. Al sen aiybyńdy óz basyńa alatyn bolsań, 15 jyldan azaitamyz túrmedegi ýaqytyńdy dep. Men oilaimyn psihologiialyq qysym, oǵan qatty qysym bolǵanyn”, – Qýandyq Bishimbaevtyń anasy.
Bir jylǵa jýyq sary ýaiymǵa salynǵan burynǵy Májilis depýtaty bolǵan ákesi otbasylyq tragediiany kótere almai júregine ota jasatypty. Qýandyqty ainalasyndaǵylar satyp ketti degen Ýálihan Bishimbaevtan balasynyń eń úlken ókinishin de suradyq.
“Onyń eń úlken ókinishi – Elbasynyń seniminen shyǵa almaǵany. Basqasyn alyp qoiǵanda birinshi orynda - Elbasy, ol kisiniń senimi. Árine bul januiamyzǵa, ata- anaǵa, Qýandyqtyń ózine úlken tragediia. Mundaidy ol kútpegen edi”, – deidi Qýandyq Bishimbaevtyń ákesi Ýálihan Bishimbaev.
Abaqtynyń azaby men dúiim jurtqa milliardtardy jep qoidy dep aty shyqqanyna kúiingen ulymyzdyń shashy aǵaryp, qan qysymy kóterile bastady deidi ata-anasy. Tórt balasynyń úlkeni aldaǵy jyly mekteppen qoshtassa, eń kishkentai tórttegi qyzy «ákem qashan keledi» dep kúnde suraidy eken.
“Balalary saǵynady. Tórttegi qyzy jylaidy, ákem qashan keledi dep. Ákem qarańǵyda otyr dep jylaidy”, – deidi anasy.
Bilim qýǵandardyń otbasynan shyqqan, úsh diplomy bar Qýandyqtyń atynda Ulttyq biýro aitqandai Qosshyda milliondarǵa salynǵan úii joq, deidi anasy. Aitýynsha, ol qurylysy bitpegen monsha eken. Al, uldarynyń isti bolýyna «Shyny koroli» atymen shyqqan Murathan Toqmádidiń qatysy bolýy múmkin dep tuspaldaidy.
Aitpaqshy, aiyptaryn moiyndaǵan birneshe kúdikti sottan bosap shyqsa, ata-anasy tańqalmaimyz dep otyr. Al, kimniń aq, kimniń kináli ekenin erteń bastalatyn sot anyqtaidy.
