Astananyń qylmystyq ister jónindegi sot alqasy sottalǵan Qýandyq Bishimbaev pen osy istegi basqa figýranttardyń apelliatsiialyq shaǵymyn qarap shyqty, - dep habarlaidy "Ult aqparat". Bul protsess sottalýshylardyń qatysýynsyz ótti.
"Bishimbaevqa qatysty apelliatsiialyq shaǵym qanaǵattandyrylmady", - dep habarlady sot alqasynyń tóraiymy Alma Esimova.
Apelliatsiialyq úkimdi shyǵarǵan soń sot tóraiymy sheshimin túsindirip berdi.
"Sot alqasy barlyq dálelderdi zerttei otyryp, biraýyzdan sottalýshylardyń barlyǵynyń kinási bar degen sheshimge keldi. Dálelder men boljamdardy barlyǵy zańdy jáne negizi bar. Olardyń barlyǵy apelliatsiialyq úkimde kórsetilgen. Barlyq epizod boiynsha, sonlai-aq, Bishimbaevtiń aldyn ala kelisimge kelip, para alǵany jaily rastaldy. Isabekten para alǵany, shyny zaýytynan aqsha jymqyrdy degen aiyptar da dáleldendi", - dedi alqa sotynyń tóraiymy Alma Esimova.
Biyl 14 naýryzda Qýandyq Bishimbaev 10 jylǵa sottalǵan bolatyn. "10 jylǵa bas bostandyǵynan jáne ómir boiyna memlekettik qyzmetterde basshy laýazymdarynda jumys isteý quqyǵynan aiyrylsyn. Jazasyn maksimaldy qaýipsiz mekemede ótesin, sondai-aq, múlki tárkilensin", - dep oqyǵan edi úkimdi sýdia Ádilhan Shaihislamov.
Eske sala keteiik, 2016 jyldyń 30 jeltoqsanynda ulttyq ekonomika eks-ministri Qýandyq Bishimbaevqa qatysty tergeý sharalary júrip jatqany belgili bolǵan edi. QR SIM basshylyq quramymen kezdesýinde Nursultan Nazarbaev Qýandyq Bishimbaevtyń qyzmetten bosatylǵanyn málimdegen bolatyn.
"Bishimbaev top bolyp, aldyn ala kelisim jasaý arqyly asa iri kólemde birneshe ret para alyp otyrǵan. Zańsyz alǵan qarajatty Bishimbaev óz qajetine jaratqan", - dep habarlaǵan edi Antikorrýptsiia qyzmetiniń ókilderi.
