Sottalǵan ulttyq ekonomika eks-ministri Qýandyq Bishimbaev sot úkimine shaǵym túsirdi, - dep habarlaidy Tengrinews.kz tilshisi.
QR UEM burynǵy basshysy shaǵymynda ózine qatysty úkimdi zańsyz ári negizsiz shyǵaryldy dep esepteidi.
"Rastap bere alamyn: ózi de, biz de - advokattary apelliatsiialyq shaǵym túsirdik. Sot úkimimen kelispeimiz. Qýandyq Bishimbaev kinásiz dep esepteimiz. Sot tergeýi kezinde onyń aiyby dáleldengen joq. Sotaldy tergeý kezinde de, sot tergeýi kezinde de qylmystyq-protsestik kodekstiń talaptary óreskel buzyldy dep sanaimyz. Qorǵaný quqyǵy buzyldy. Basty dálelimiz onyń kinásizdigi jáne aiybynyń dáleldenbeýi", - dep habarlady Tengrinews.kz tilshisine eks-ministrdiń advokaty Mádi Myrzaǵaraev.
"Bishimbaev óz kózqarastaryn, dálelderin sot tergeýi kezinde, sózjarysta jáne sońǵy sózinde túgeldei aitty. Ol bul epizodtarǵa qatysy joq ekenin naqty túsindirdi. Bireý-mireýler zańdy buzǵan da shyǵar, biraq onyń qatysy joq. Onyń qandai da bir áreketterge qatysy baryn túgeldei joqqa shyǵaramyz", - dedi Bishimbaevtyń advokaty.
Biylǵy naýryzdyń 14-i Astananyń qylmystyq ister jónindegi mamandandyrylǵan aýdanaralyq soty Qýandyq Bishimbaevty para aldy dep aiypty dep tanyp, 10 jylǵa bas bostandyǵynan aiyrǵan. Istiń qalǵan 22 figýranty túrli jazaǵa kesilgen bolatyn.
