Qýandyq Bishimbaev 12 jylǵa barynsha qaýipsizdendirilgen mekemede óteýge 12 jylǵa bas bostandyǵynan aiyrý túrindegi jaza suraýyna qatysty pikir bildirdi, - dep habarlaidy Tengrinews.kz tilshisi.
"Árine, aiyptaýshylardyń surap otyrǵan jazasy meni abdyratyp tastady. Esh kelise almaimyn. Meniń ustanymym bir ǵana oiǵa negizdelgen - men jasamaǵan qylmysty jasadym dep aita almaimyn. Búgin (19 aqpan) keltirilgen dálelder men jalpy sot otyrystarynda aitylǵandar sottalýshylar moiyndap otyrǵan qylmysqa meniń qatysymnyń bar ekenin dáleldemeidi. Kináni moiyndaǵan jaqsy. Biraq moiyndaýmen qatar jala jabýǵa kóshkeni jaman", - dedi Qýandyq Bishimbaev.
Eske salaiyq, osy sot otyrysynda prokýrorlar Qýandyq Bishimbaevty QR Qylmystyq kodeksiniń 28-babynyń 3-bóligi, 189-babynyń 4-pýnkii, 366-babynyń 4-bóligi boiynsha aiypty dep tanyp, 12 jylǵa bas bostandyǵynan aiyrýdy suraǵan edi.
"Qýandyq Bishimbaevty 12 jylǵa bas bostandyǵynan aiyryp, jeke menshigindegi qylmystyq jolmen tabylǵan múlkin tárkilep, ómir boiyna memlekettik organdarda jáne kommertsiialyq uiymdarda basshylyq oryndaryndaǵy qyzmetke ornalasý quqyǵynan aiyrýdy, jazany barynsha qaýipsizdendirilgen qylmystyq-atqarý júiesi mekemesinde ótetýdi usynamyz. QR Prezidentine Qýandyq Bishimbaevty "Qurmet" ordeninen aiyrý týraly usynys shyǵarýdy suraimyz", - dep málimdegen edi prokýror Álibek Aitjanov.
Astanada eks-ministr men taǵy 22 figýrantqa qatysty istiń basty sot otyrysy osymen tórtinshi aiǵa jalǵasyp jatyr. Osy ýaqyt boiynsha protsess qatysýshylary barlyq sottalýshynyń, kýágerdiń, is materialyn zerttep jatqandardyń pikirin tyńdap, aýdio jáne videojazbalarmen tanysty.
Al biylǵy qańtarda Qýandyq Bishimbaev sotqa bergen kýáliginde ózine taǵylǵan aiyppen kelispeitinin jáne istiń qalai bolǵanyn óz tarapynan aityp bergen bolatyn. 25 qańtarda prokýrorlar jańa aiyptaý aktisin usynǵan. Budan keiin eks-ministrge taǵylǵan aiyptarǵa tek bir pýnkt qosylyp, al jalpy ózgerissiz qalǵan edi.
Munyń aldynda eks-ministr Memleket basshysynan keshirim suraǵan edi. "Prezidenttiń aldynda kináli ekenimidi bilemin. Men tanityn adamdar, men ózim jumysqa shaqyrǵan Jaqsybaev, Jaqypov jáne taǵy basqalar maǵan nuqsan keltirdi, men olar úshin Memleket basshysy aldynda jaýaptymyn. Osy jaǵdai úshin jáne Prezidenttiń senimin aqtai almaǵanym úshin uialamyn. Kadrlardy tańdaý kezinde qatty qatelestim. Meniń senimime kirip, meni tek qoldanǵan adamdardy ózime jaqyndattym. Memleket basshysynan keshirip suraimyn, halyqtan osy úshin keshirim suraimyn", - degen edi Bishimbaev.
Sondai-aq, osyǵan deiin sotta Bishimbaevtyń áieli de sóz sóilegen edi. "(...) QR QPK-nyń 120-babynyń 1-taraýyn nazarǵa alyp, jýrnalistik tergeý resmi qujat retinde moiyndalý kerek. Al 125-bap boiynsha qylmystyq isti sheshý úshin dálelerdi baǵalaý qatystylyq, dáleldilik tusynan baǵalaný kerek. Osyǵan bailanysty zaýyt qurylysy týraly maqalalardy iske qosýyńyzdy suraimyn", - degen edi Bishimbaevtyń áieli sot zalynda.
2016 jyldyń 30 jeltoqsanynda ulttyq ekonomika eks-ministri Qýandyq Bishimbaevqa qatysty tergeý sharalary júrip jatqany belgili bolǵan edi. QR SIM basshylyq quramymen kezdesýinde Nursultan Nazarbaev Qýandyq Bishimbaevtyń qyzmetten bosatylǵanyn málimdegen bolatyn.
