QR Eńbek jáne halyqty áleýmettik qorǵaý ministri Birjan Nurymbetov «jetkiliktik shegine» qatysty túsinik berdi , dep habarlaidy QazAqparat.
«El Prezidenti óziniń Joldaýynda áleýmettik salaǵa qatysty birqatar tapsyrma bergen bolatyn. Sonyń ishinde halyq tarapynan basym qyzyǵýshylyq tanytqan Biryńǵai zeinetaqy jinaqtaýshy qorynan azamattar óziniń jinaǵynyń bir bóligin turǵyn úi máselesin sheshýge, emdelýge jáne basqa da zeinetaqy basqarý kompaniialaryna investitsiialaý úshin aýdarý múmkindigine qatysty bolyp otyr. Birinshiden, ondai múmkindikke eńbekke qabiletti, iaǵni zeinet jasyna jetpegen, atalǵan qorda jinaqtary bar azamattar ie bolady. Olar ózderiniń «jetkiliktik sheginen» asatyn qarajatyn tolyǵymen atalǵan maqsattarǵa paidalana alady. Bul turǵyda negizgi másele – ol «jetkiliktik shegi». Ol ne úshin belgilenedi, qalai esepteledi? Birinshiden, elimizde 1998 jyldan bastap jinaqtaýshy zeinetaqy júiesi engizilgen. Ár azamat óz jalaqysynan 10 paiyzdyq jarnany qorǵa aýdaryp keledi», - dep toqtaldy ministr Ortalyq kommýnikatsiialar qyzmetinde.
Osy oraida B. Nurymbetov zeinetke jetken azamat úshin zeinetaqy alýdyń úsh kózi qalyptasqanyn eske saldy. Bul turǵyda memekettik biýdjet esebinen jasyna kelgen zeinetaqy jáne bazalyq zeinetaqylyq tólem, sondai-aq zeinetaqy jinaqtaýshy qorynan jinalǵan qarjy esebinen zeinetaqy qamtylǵan.
«Bul reforma 1998 jyldan bastalǵanyn eskersek, jyldar ótken saiyn zeinetaqy jinaqtaýshy qorynan alatyn zeinetaqynyń úles salmaǵy da ósedi. Boljam boiynsha 2040 jyldan keiin zeinet jasyna jetken bizdiń azamattarymyz úshin jinaqtaýshy qordan alatyn zeinetaqysy negizgi kózi bolady. Sondyqtan jinaqtaý júiesiniń negizgi maqsaty – ol azamattar ózine zeinetkerlikke qarajat jinaidy. Osyǵan bailanysty bolashaqta zeinetaqyǵa jetetin qarajat ár adamnyń sol qordaǵy esep-shotynda qalýy tiis. Osy turǵyda «jetkiliktik shegi» belgilenedi», - dep túsindirdi vedomstvo basshysy.
«Qajettilik shegin esepteý tártibi resmi Úkimettiń arnaiy qaýlysymen bekiletin bolady. Osy kúnge deiin onyń mólsherin ár jasqa eseptep habarlaǵan edik. «Jetkiliktilik sheginiń» negizgi parametrleri áielder men erler úshin biryńǵai mólsherde qaraldy. «Jetkiliktilik shegi» degenimiz – ol erteń zeinet jasyna jetkende zeinetaqy jinaqtaý qorynan eń kem degende tómengi mólsherde zeinetaqy alýǵa múmkindik beretin soma. Óz kezeginde ony ár jas shamasyna qarai eseptedik. Jas azamat zeinet jasyna deiin keminde eń tómengi jalaqy alyp, sonyń 10 paiyzyn aýdaryp otyrsa, keiin zeinet jasyna jetkennen soń, eń tómengi zeinetaqy alýǵa múmkindik beretin «jetkiliktik shegi» qarastyryldy», - dedi Birjan Nurymbetov.
Sonymen qatar ol atalǵan múmkindikti zeinet jasyna jetken kisiler de paidanalana alatynyn atap ótti.
«Ol zeinet jasyna jetip otyr, memleketten zeinetaqy alady jáne jinaqtaýshy qorynan zeinetaqy alyp júrgen adamdar osy qorda qalǵan qarajatynyń 50 paiyzyna deiin alady», - dedi ministr.
Budan buryn habarlanǵandai, 2021 jyldyń 1 qańtarynan bastap Qazaqstan azamattary Biryńǵai jinaqtaýshy zeinetaqy qoryndaǵy jinaqtarynyń bir bóligin paidalana alady.
Osyǵan orai QR Eńbek jáne halyqty áleýmettik qorǵaý ministrligi el azamattarynyń zeinetaqy jinaqtaryn paidalaný úshin «jetkiliktilik shegin» jariialady.
