Eńbek jáne halyqty áleýmettik qorǵaý ministri Birjan Nurymbetov Biryńǵai jiyntyq tólemge aýdarym jasamaǵan azamattar 42,5 myń teńgeni qalai alatynyn aityp berdi, dep habarlaidy QazAqparat
«42,5 myń teńgelik áleýmettik tólemdi alýda mynadai kópshilikke ótinishimiz bar: Birinshiden málimetińizdi durys toltyrý kerek. Ózińizdiń esepshotyńyzdy durys kórsetip, JSN nómirin durys belgileý kerek. Ekinshiden sońǵy eki aida bolsyn saqtandyrý qoryna aýdarylǵan áleýmettik tólem bolýy tiis. Sebebi bul tólem bir kassadan tólenip jatqan joq. Memlekettik saqtandyrý qorynan aýdarylyp jatyr. Biraq osyndai áleýmettik tólemderi múlde joq azamattar da bar. Iaǵni beiresmi jumys istep júrgenderdiń eńbek sharttary joq, olar salyq tólemegen. Sondyqtan beiresmi jumys istep júrgen azamattarǵa Prezident rásimdelý ǵana jetkilikti ekenin aitty. Rásimdelý degen ne? Ol úshin Biryńǵai jiyntyq tólemdi bir mezgil tóleseńiz jetkilikti. Ol soma qala turǵyndary úshin 2651 teńge, aýyl turǵyndary úshin 1325 teńge. Osyny bir tóleseńizder 42500 teńgeni ai saiyn alatyn bolasyzdar», - dedi Birjan Nurymbetov OKQ-da ótken baspasóz máslihatynda.
Ministrdiń aitýynsha sol tólemdi qalai jasaýǵa bolatynyn da túsindirdi.
«Halyq bank, Forte bank, Jýsan bank, Sberbank, BTsK, Kaspi bankterde mobildi qosymshalar bar. Sol arqyly Biryńǵai jiyntyq tólemdi aýdarýǵa bolady. Bolmasa SMS arqyly: telefonnan SMS-ti 5505 nómirine habarlama jazyp, qala turǵyny bolsańyz latyn áripterimen «gorod ESP» dep JSN belgileisiz, aýyl turǵyny bolsańyz «selo ESP» dep JSN belgileisiz. Osyny jibergennen keiin tólemderińiz esepke túsedi. Osydan keiin 42 500 teńgeni alýǵa múmkindigińiz bar», - dedi ol.
