Koronavirýs indeti taralýynyń qaýpi basylmaýy saldarynan biyl jańa oqý jyly qashyqtan oqytý formatynda bastalǵany belgili. Biraq, mundai formatty uiymdastyrý barysynda Úkimet tarapynan qatelikterge boi aldyrǵany da jasyryn emes. Ony kúni keshe ǵana Qazaqstan halqyna dástúrli Joldaýyn jariialaǵan Memleket basshysy da ashyq aitqan edi.
«Qashyqtan oqytý isin uiymdastyrýda Úkimettiń jibergen qatelikterin jaqsy bilemiz. Ashyǵyn aitqanda, áli kúnge deiin naqty bir onlain-platforma joq. Muǵalimder, oqýshylar jáne ata-analar kúndiz-túni «WhatsApp»-tan bas kótermeitin boldy. Tolyqqandy oqý úderisi úshin qajetti barlyq fýnktsiialary bar biryńǵai onlain bilim berý platformasyn shuǵyl ázirleý qajet», - degen edi Qazaqstan Prezidenti.
Shynymen de búginde orta bilim salasynda oqýshylar qoldanatyn biryńǵai onlain bilim berý platformasy joq. Jalpy Bilim jáne ǵylym ministrligi tarapynan bekitilgen 8 platforma bar. Osy platformalardyń yńǵaiyna, berip otyrǵan múmkindigine bailanysty mektepter, qalalyq, aýdandyq bilim bólimderi sheshim qabyldap, kelisimshartqa qol qoiady jáne sol platformamen jumys isteidi. Máselen, eloralyq oqýshylar BilimLand pen Daryn.online platformasyn qoldanatyndyǵy belgili. Munan bólek, ustazdar Teams, Zoom baǵdarlamalaryn qoldanyp, WhatsApp áleýetine júginýge de májbúr bolyp otyr. Al bul problemalar qashan sheshilmek? Munyń jaýabyn búgin Úkimet úiinde ótken baspasóz máslihaty barysynda elimizdiń Bilim jáne ǵylym ministri Ashat Aimaǵambetov aityp berdi.
«Memleket basshysy orta bilim boiynsha qashyqtan oqytý platformalarynyń múmkindigin arttyrý tapsyrmasyn bergenin bilesizder. Birkelkilendirý, ortaq talaptar qoiý boiynsha jumysty bastap kettik. Ári qarai bul jumysty jalǵastyryp, tiisti deńgeide oryndaityn bolamyz», - dep sendiredi ministr.
Memleket basshysy Joldaýynda ustazdardyń jalaqysyn 2021 jyldyń qańtar aiynan bastap 25 paiyzǵa kóbeitiletini, bul maqsatqa aldaǵy úsh jylda qosymsha 1,2 trillion teńge bólinetini aitylǵan edi. Osy máselege orai ministr qajetti qarajat biýdjette qarastyrylyp qoiǵanyn aitady. Buǵan qosa, osy jyldyń qyrkúiek aiynyń ózinde ustazdardyń dápter tekserý boiynsha ústemeaqysy 2 ese kóbeiip, synyp jetekshiligi úshin alatyn ústemeaqysy da eki ese arttyrylǵan eken. Al magistratýra bitirgen ustazdarǵa magistrlik deńgeiine sáikes aiyna qosymsha 27 myń teńge tólene bastamaq.
Joldaýda 6 jasqa deiingi balalardy mektepke deiingi tárbiemen jáne bilimmen 2025 jylǵa qarai 100 paiyz qamtý mindeti qoiylǵan edi. Osy máselege orai pikir bildirgen Ashat Aimaǵambetov 6 jasqa deiingi balalardy balabaqshamen 100 paiyz qamtý máselesin iske asyrýdyń eki ereksheligine toqtalady.
«Birinshiden, bul tapsyrmany memlekettik tapsyrys berý arqyly jekemenshik balabaqshanyń úlesin arttyrý esebinen oryndaimyz. Qysqa ýaqyttyń ishinde jekemenshik sektordy damytýdyń arqasynda ózgeris boldy. Qamtý paiyzy ósti. Ary qarai osy baǵytpen jumys istep, balalardy balabaqshamen qamtý máselesin sheshemiz»,- dedi ministr.
Onyń aitýynsha, ekinshi erekshelik – vaýcherlik tetik.
«Vaýcherlik tetik degenimiz ne? Máselen, búginde ata-ana balasynyń kezegi kelgennen keiin qai balabaqshaǵa baratynyn memleket kórsetip beredi. Endi munan keiin Memleket basshysynyń tapsyrmasy boiynsha vaýcherlik tetik qoldanylady. Iaǵni, ata-ana óziniń vaýcherin alyp, ózine unaǵan, tiimdi degen balabaqshany tańdaidy. Qazirgi ýaqytta oblys ne qalanyń, aýdannyń bilim bólimderi, basqarmalary konkýrs ótkizip, qai balabaqsha memlekettik tapsyrys alatynyn anyqtasa, endi ata-ana ózi tańdaidy. Bul eń aldymen básekelestikti arttyrady. Al básekelestik bolǵanda sapa jaqsarady. Sondyqtan bul óte mańyzdy tapsyrma», - dedi Ashat Aimaǵambetov.
«Memleket basshysy aýyl, qala mektepterin damytý, ásirese jalpy bilim berýdi damytý boiynsha da tapsyrma bergen edi. Bul tapsyrmany oryndaý úshin de ministrlik tiisti jumystar júrgize bastamaq.
«Eń aldymen shaǵyn jinaqty mektepterge qatysty. Olarda birneshe problema bar. Birinshisi - ustazdardyń jetispeýshiligi, ekinshisi - materialdyq-tehnikalyq bazasy, bilim deńgeii. Sondyqtan osy turǵyda jumys júrgizemiz. Eńbekaqy tóleý tetigin ózgertemiz. Utqyr muǵalim, internat salý, ádistemelik kómek, oqytý jumystary, jalpy materialdyq-tehnikalyq bazany jańartý boiynsha is-sharalar qabyldanady», - dedi ol.
Aita keterligi, balalar men jastardyń shyǵarmashylyq áleýeti maqsatynda óńirlerde ulttyq qolóner ortalyqtaryn ashý josparlanyp otyr. Muny joǵaryda atalǵan baspasóz máslihatyna qatysqan QR Mádeniet jáne sport vitse-ministri Nurqisa Dáýeshov aitqan bolatyn.
«Onda jas urpaq ókilderi shyǵarmashylyq jáne qolóner negizderin meńgeretin bolady. Búgingi tańda osyndai keshenderdiń biri Jambyl oblysyndaǵy «Shahristan» ortalyǵy sanalady. Budan basqa, Túrkistan qalasyndaǵy Halyqaralyq týrizm jáne qonaqjailylyq ýniversiteti kesheniniń bazasynda qolóner ortalyǵyn ashý josparlanyp otyr. Osy ortalyqtardyń jumys isteý tájiribesin zerdelegennen keiin el óńirlerinde qolóner ortalyǵy jelisin keńeitý boiynsha odan ári jumys júrgiziledi»,- dedi vitse-ministr.
Onyń atap ótýinshe, balalardy shyǵarmashylyqqa jappai tartýdyń osyndai qaǵidaty boiynsha respýblikalyq jáne jergilikti deńgeidegi mádeniet uiymdarynda shyǵarmashylyq úiirme qurýǵa bastamashylyq jasalady. Bul balalardy damytý maqsatynda bos ýaqytyn tiimdi paidalanýdy qamtamasyz etip, talantty balany erte anyqtaýǵa yqpal etedi. Sonymen qatar, mádeniet jáne óner uiymdarynda belsendi eresektermen ózara is-qimyl jasaý úshin qajetti jaǵdai iske asyrylady.
Munan bólek, 2021 jylǵy 1 qańtardan bastap mádeniet jáne sport salasyndaǵy mamandandyrylǵan mektepter men kolledjder qyzmetkerleriniń jalaqysy 2023 jylǵa deiin jyl saiyn 25 paiyzǵa ulǵaiatyn bolady. Al, búginde QR Parlamenti Májilisinde qarastyrylyp jatqan buqaralyq sportty damytýǵa baǵyttalǵan zań jobasy aiasynda memlekettik bilim uiymdarynyń pedagogtaryna sabaqtan tys sport sabaqtaryn júrgizgeni úshin bazalyq laýazymdyq jalaqydan 100 paiyz mólsherinde qosymsha aqy engizý máselesi pysyqtalý ústinde.
.jpeg)