Burynǵy densaýlyq saqtaý ministri Eljan Birtanov sotta tergeýdiń úiqamaqta ustaý merzimin uzartýǵa bailanysty ótinishin qaraý kezinde ózin jáne otbasyn birneshe kólik ańdyp júrgenin aitty. Birtanov tergeý ýaqytty ańdýǵa emes, isti obektivti tergeýge jumsaýy kerek ekenin jetkizdi, dep jazady KAZ.NUR.KZ.
Búgin Nur-Sultan soty tergeýdiń Eljan Birtanovqa qatysty úi qamaq merzimin uzartý týraly ótinishin onlain-qaraýdy jalǵastyrýda.
Keshe, 5 mamyrda prokýror qamaýǵa alý merzimin uzartýdy suraý kezinde Birtanovtyń buǵan deiin qamaýda ustaý shartyn buzǵanyn málimdegen edi. Máselen, ol týystarymen jáne kórshilerimen kezdesken.
Al Birtanov bolsa shartty buzbaǵanyn, buǵan deiin sýdia oǵan basqa adamdarmen kezdesýge ruqsat bergenin aitty.
"Bultartpaý sharasyna qatysty - baryp turǵan ótirik. Ótken sot otyrysynda sýdia Isaeva meniń úiqamaq kezinde basqa adamdarmen kezdesýge quqyǵym bar ma degen saýalǵa naqty jaýap berdi. Biraq meniń balalarmen serýendeý kezinde týysymmen kezdesýim jáne azyq-túlik satyp alýǵa barǵan kezde kórshimmen jáne dosymmen kezdesý sýdianyń maǵan bergen rejimin buzý retinde qarastyrylýda.
Sonda sýdianyń áreketin nemese tergeý organdarynyń áreketin qalai túsinýge bolady? Bul aldyn ala oinalǵan oiyn boldy ma álde tergeý organy jai ǵana biliksizdik tanytyp, meni qýdalaýǵa múddeli me?
Men jumysqa shyqtym. Sýdia maǵan ruqsat etken barlyq nárseni anyq túsindim - bul ýaqytta adamdarmen kezdesip, jumys istep, ózime de elime de paidamdy tigizýime bolady. Men bul turǵyda óz quqyǵymdy naqty saqtap otyrmyn dep sanaimyn", - deidi Eljan Birtanov.
Sondai-aq, eks-ministr óziniń jáne otbasynyń izine túskenin de málimdedi.
"Tergeý atalǵan isti tolyq ári jan-jaqty tergeýdiń ornyna aqsha men ýaqytty meni ańdýǵa jumsap otyr. Qara piar. Kúndelikti úsh kólik balalarym men jubaiymdy dúkender men jumystyń ainalasynda ańdyp júredi. Men olardyń nómirin berýge de daiynmyn.
Men munyń ne úshin qajet ekenin bilmeimin. Buǵan sot ruqsat etken bolýy múmkin. Biraq buǵan ketken ýaqytty isti tolyqqandy ashýǵa jumsaý kerek dep oilaimyn", - deidi ol.
Sondai-aq Birtanov pen onyń qorǵaýshylary densaýlyq saqtaý ministrligine arnalǵan aqparattyq platforma, tergeý nusqasynda kórsetilgendei "iske jaramsyz" kúide emestigin alǵa tartty. Birtanov dál osy platformanyń iske qosylýyn júzege asyrý kezinde aqsha jymqyrdy dep kúdiktelip otyr.
