Halyq densaýlyǵy kodeksiniń jańa nusqasyna qarsylyq - progresten qorqý. Bul týraly QR densaýlyq saqtaý ministri Eljan Birtanov Facebook-tegi paraqshasynda jazdy, dep habarlaidy "Ult aqparat".
«Búgin maǵan WhatsApp jelisi arqyly birneshe habarlama keldi. Qoǵamdyq belsendilik tanytyp júrgen azamattar Halyq densaýlyǵy kodeksiniń jańa nusqasyn Parlamentten keri qaitaryp alý týraly petitsiiaǵa qol qoiýǵa shaqyrypty. Iaǵni, olardyń biyl kúzden beri qarai atqarylǵan qyrýar sharýany joqqa shyǵarǵysy keledi. Menińshe, munyń astarynda progresten qorqý nemese dárigerler men patsientterge beriletin múmkindikterdiń mánin jete túsinbeý syndy úlken másele jatyr. Jalpy, biz ózgeristerden qorqamyz, úirengen súrleýmen júre bergimiz keledi. Biraq densaýlyq saqtaý salasyn damytqymyz kelse ózgeris jasamai bolmaidy. Kodeks búgingi qoǵamnyń úzdik densaýlyq saqtaý júiesine kóshýge degen suranysyna tolyq jaýap beredi», - dep jazdy ministr.
Eljan Birtanov ózi de, Densaýlyq saqtaý ministrligi de Kodekske qatysty týyndaǵan saýaldarǵa jaýap berýge daiyn ekendigin atap ótedi.
«Barshańyzdy dúisenbi, 23 jeltoqsan kúni saǵat 11:00-de Astana meditsina ýniversitetinde ótetin kezdesýge shaqyramyn. Kezdesý ýaqyty ózgerip jatsa, osy jerge jazamyn. Kelińizder, biz barlyq suraqtarǵa jaýap berýge daiynbyz. Eger bul kezdesý azdyq etse, turaqty túrde júzdesip turaiyq. Sebebi, engizilip jatqan reformalar kóp, al, jurtshylyqty mazalaityn suraqtar odan da kóp», -dedi ol.
