QR Densaýlyq saqtaý ministri Eljan Birtanov Qaskeleń qalasyndaǵy juqpaly aýrýlar aýrýhanasynyń jabylatyny nemese jabylmaityny jaily suraqqa jaýap berdi, dep habarlaidy QazAqparat tilshisi.
«Qaskeleńdegi infektsiialyq aýrýhana týraly aitar bolsaq, bizde nysannyń sanitarlyq normalar men erejelerge sai kelmeitini týraly ótken jylǵy Qoǵamdyq densaýlyq saqtaý komitetiniń qorytyndysy bar. Ákimdikke buiryq berildi, shilde aiynyń sońyna deiin kemshilikter joiylýy kerek. Taǵy da bir ret tekserý jumystary júrgiziletin bolady. Eger osy kemshilikterdiń kózi joiylsa, onda nysan ary qarai jumysyn jalǵastyra alady», - dedi Eljan Birtanov Úkimet otyrysynan keiin tilshilerdiń saýalyna jaýap bere otyryp.
Ministr degenmen nysannyń áli de memlekettik normativterge sai kelmeitinin eske saldy.
«Biz ony aýdandyq aýrýhanaǵa biriktirip, ol jeke aýrýhana emes, qurylymdyq bólimshe retinde jumys júrgizgenin qalap otyrmyz. Bul qadam meditsinalyq qyzmetterdiń sapasyn arttyrýǵa baǵyttalady. Sebebi, aýyr infektsiia juqtyrǵan naýqastar ózge de mamandardyń - hirýrg, reanomotolog, kardiologtardyń qatysýyn qajet etedi», - deidi Eljan Birtanov.
Ministr qazirgi ýaqytta jergilikti atqarýshy organ sáikesinshe baǵalaý jumysyn júrgizip, sheshim qabyldaýy kerektigin aitady.
«Jalpy, biz Almaty oblysyndaǵy aýyldardaǵy aýrýhanalar sanitarlyq talaptarǵa sáikestendiriledi degen úmittenemiz», - dedi ministr.
Sondai-aq, Eljan Birtanov Qaskeleńdegi infektsiialyq aýrýhanaǵa kemshilikterdi joiý 1 shildege deiin mindettelip otyrǵan aityp ótti. Alaida ol kemshilikterdiń joiylatynyna kúmán keltirdi.
«Bul kemshilikter joiylmasa, biz nysandy jabý týraly jáne memlekettik tapsyrysty ornalastyrý boiynsha Meditsinalyq saqtandyrý qorymen kelisimshartty buzý týraly sotqa beremiz», - deidi Eljan Birtanov.
Eske sala ketsek, buǵan deiin Almaty oblysynda barǵan Eljan Birtanov Qaskeleń aýrýhanasynyń jaǵdaiyn nashar dep baǵalap, atalǵan nysannyń jabylatynyn jariia etken edi.
Alaida keshe Almaty oblysy əkiminiń orynbasary Jaqsylyq Omar Qaskeleń qalalyq infektsiialyq aýrýhanasy jabylmaitynyn málim etken edi.
