Nur-Sultan qalasy Saryarqa aýdandyq №2 sotynda burynǵy Densaýlyq saqtaý ministri Eljan Birtanovtyń isi boiynsha alǵashqy aldyn ala sot tyńdaýy ótti, dep habarlaidy QazAqparat.
Aldyn ala tyńdaý barysynda qorǵaýshy Serik Saǵaliev Eljan Birtanovtyń ózine taǵylǵan aiyptardy moiyndamaitynyn aitty.
«Bizdiń qorǵaýymyzdaǵy E.Birtanov sotqa deiingi tergeý barysynda da taǵylǵan aiypty moiyndaǵan joq qazir de moiyndamaidy», - dedi ol.
Nur-Sultan qalasy Saryarqa aýdandyq №2 sotynyń sýdiasy Ibragim Álkenov aiyptalýshy taraptan is materialdaryna qatysty qandai da bir qarsylyq, shaǵymdary bar-joǵyn surady.
Eks-ministr Eljan Birtanov pen onyń orynbasary bolǵan Oljas Ábishevtiń advokattary aiyptaý materialymen tanysyp úlgermegenin aityp, qujattarmen tolyq tanysyp shyǵýǵa múmkindik berýdi surady.
Al kúdikti Oljas Ábishevtiń ózi memlekettik is materialynyń naqty kólemi týraly búgin ǵana shynaiy aqparat alǵanyn aitty.
«Búgin men biletin 133 tomnan basqa taǵy 4 tom bar ekenin birinshi ret estip turmyn. Bul men úshin jańa málimet. Resmi túrde málimdegim keledi, nege tergeý organy bul tomdardy jasyryp qalǵan? Maqsattary qandai bolǵan? 133 tom bar dep júrgenbiz. Búgin taǵy 4 tom bar dep otyr. Sonda barlyǵy 137 tom bolyp shyǵady. Bul 4 tom týraly bizge nege eshkim aitqan joq?» - dedi Oljas Ábishev.
Sýdia Ibragim Álkenov bul suraqty erteńgi tyńdaýda protsessýaldyq prokýrorǵa qoiýǵa keńes berdi. Onyń aitýyna qaraǵanda, E.Birtanovtyń isi boiynsha sotqa 141 tom material túsken.
«Sotqa aiyptaý aktilerin qosqanda 141 tom material kelip tústi», - dedi sýdia.
Atalmysh is boiynsha aldyn ala tyńdaý erteń, iaǵni, 27 qańtar kúni saǵat 15.00-de jalǵasatyn boldy.
