Kóktemgi sý tasqyny Qazaqstan úshin úlken synaq boldy. Tabiǵi apattyń saldarynan 70 myńnan astam adam evakýatsiialanyp, 12 myńnan astam turǵyn úi men 7 myń saiajai búlindi. Sý joldardy shaiyp, qunarly jerlerdi zaqymdap, kóptegen adamdy baspanasy men múlkinen aiyrdy.
Memleket shuǵyl túrde ótemaqy tóleý jáne qoldaý sharalaryn uiymdastyrý jumystaryn qolǵa aldy. Prezidenttiń yntymaqtastyqqa shaqyrýy qoǵamda keńinen qoldaý taýyp, kóp kúttirmei keri bailanys ornady. Biznes-qaýymdastyq alǵashqy bolyp kómekke kelip, zardap shekkenderge 250,5 milliard teńge jinady. Iri kompaniialar, kásipkerler men qarapaiym azamattar da qaiyrymdylyq aktsiialaryna belsendi qatysyp, ulttyq deńgeide úlken yntymaq tanytty.
Saýaby mol iske at salysqandar qatarynda «World Green Company», «Jusan Bank», «ERG», «Bazis-A», Samruk-Kazyna Trust, «QazMunaiGaz», «Qazmyrysh», «Halyk Bank», «Kaspi», «Qazaqstan halqyna» qory jáne basqa da uiymdar boldy. Sonymen qatar, jeke kásipkerler men metsenattar, atap aitqanda Muhamed Izbastin, Aidyn Rahymbaev, Andrei Lavrentev, Nurlan Smaǵulov jáne basqa da atqa minerler aianyp qalmai, belsendilik tanyta bildi. Mysaly, Muhamed Izbastin «Qazaqstan halqyna» qoryna 450 million teńge aýdaryp, eldiń birligi bekem bolsa, kez kelgen qiyndyqty eńserý ońai bolatynyn atap ótti. Andrei Lavrentev te aitarlyqtai kómek kórsetti. Atap aitar bolsaq Qostanailyq mashina jasaýshylardan 250-ge jýyq adamdy evakýatsiialaý sharalaryna jumyldyrdy. «Allur» zaýyty arnaiy tehnika bólip, «AGROMASH» zaýyty zardap shekkenderge jataqhanadan baspana usyndy. Bul tek qarjylai emes, materialdyq qoldaýdyń bir úlgisi boldy.
Dana halqymyzdyń bir-birine kómek kórsetý dástúri tereńnen tamyr alady. Asar jasaý, jylý jinaý, shúlen taratý siiaqty igi ister ulttyq mádenietimiz ben islam dininiń ajyramas bóligine ainalǵaly san ǵasyr ótti. Bul joly da osy dástúr óz jalǵasyn taýyp, kóptegen kásipkerler men uiymdar tabiǵi apattyń zardaptaryn joiýǵa bilek sybana kiristi.
Qazaqstanda búginde júzdegen qaiyrymdylyq uiymdary jumys isteidi. Olardyń ishindegi «Qazaqstan halqyna» qoryn airyqsha atap ótýge bolady. Qor densaýlyq saqtaý, bilim berý, mádeniet jáne sport salalaryn damytýǵa úles qosyp, tótenshe jaǵdailarda zardap shekkenderge qoldaý kórsetýmen ainalysady. Iri biznes ókilderi qor jumysyna belsendi qatysyp, áleýmettik jaýapkershilikti arttyrýǵa yqpal etip keledi. Qazirgi tańda qor 17 qaiyrymdylyq bastamasy men baǵdarlamasyn júzege asyryp, olardyń sanyn eki ese arttyrýdy josparlap otyr. Biznes-qoǵamdastyq bul bastamalardy qoldai otyryp, áleýmettik kómek júiesin damytý jolynda da aianyp qalmaýda.
Qorytyndylai kele, kóktemgi sý tasqyny elimizdiń birligin synaǵan naǵyz syn saǵaty boldy. Degenmen, bul apat qoǵamymyzdyń tózimdiligin, jaýapkershiligin jáne yntymaqtastyq rýhynyń deńgeiin kórsetti. Memleket, biznes jáne qarapaiym halyq birlesip, qiyndyqtardy eńserýdiń aiqyn úlgisin tanyta bildi. Bul jaǵdai elimizdegi azamattyq qoǵam men qaiyrymdylyq dástúriniń jańa deńgeige kóterilgenin dáleldep, aldaǵy ýaqytta da birlesken kúsh-jiger arqyly kez kelgen synaqtan súrinbei ótetinimizdi kórsetti. Sebebi, bizdiń kúshimiz - birlikte. Bir jaǵadan bas, bir jeńnen qol shyǵara otyryp kótergen júk qashan da jeńil bolmaq.
