«Birlik» partiiasy Shymkent qalasy men Túrkistan oblysy máslihattary depýtattaryn sailaýǵa qatysa almaidy. Bul týraly búgin QR Ortalyq sailaý komissiiasynyń múshesi Asylbek Smaǵulov aitty, dep habarlaidy QazAqparat.
«Saiasi partiialardy máslihattar depýtattaryn sailaýǵa qatysýǵa jiberýge qatysty aitar bolsaq, «Aq jol», «Aýyl», «Nur Otan», Qazaqstannyń kommýnistik halyq partiiasy jáne Jalpyulttyq sotsial-demokratiialyq partiiasy qoǵamdyq birlestikteriniń filialdary 14 oblysta, sonymen qatar Nur-Sultan, Almaty jáne Shymkent qalalarynda tirkelip, jumys isteýde. «QR-daǵy Sailaý týraly» konstitýtsiialyq zańnyń 103-baby 2-tarmaǵyna sáikes, máslihattar depýtattyǵyna kandidattar usyný quqyǵy belgilengen tártippen tirkelgen partiianyń filialdaryna berilgen. Degenmen, «Birlik» saiasi partiiasynyń tiisti filialdary bolmaǵandyqtan, Shymkent qalasy men Túrkistan oblysy máslihattary depýtattaryn sailaýǵa qatysa almaidy», - dedi Asylbek Smaǵulov OSK otyrysynda.
Sonymen, Ortalyq sailaý komissiiasy qabyldaǵan partiialyq tizimder boiynsha sailanatyn máslihattar depýtattaryn sailaýǵa qatysýǵa jiberý týraly qaýlyǵa sáikes:
- «Aq jol» Qazaqstannyń demokratiialyq partiiasy» qoǵamdyq birlestigi,
- «Aýyl» halyqtyq-demokratiialyq patriottyq partiiasy» qoǵamdyq birlestigi,
- «Birlik» saiasi partiiasy» qoǵamdyq birlestigi,
- «Jalpyulttyq sotsial-demokratiialyq partiiasy» respýblikalyq qoǵamdyq birlestigi,
- «Qazaqstannyń kommýnistik halyq partiiasy» qoǵamdyq birlestigi,
- «Nur Otan» partiiasy» qoǵamdyq birlestigi sailaýǵa qatysady.
Al «Birlik» saiasi partiiasy» qoǵamdyq birlestigi Shymkent qalasy men Túrkistan oblysy máslihattary depýtattaryn sailaýǵa qatysa almaidy.
Alaida, QR OSK Tóraǵasy Berik Imashevtiń atap ótýinshe, «Birlik» partiiasynyń atalǵan óńirlerde filialdaryn ashyp, sailaýǵa túsýge múmkindigi bar.
«Máslihattar depýtattyǵyna kandidattardyń partiialyq tizimderin usyný kezeńi 2020 jylǵy 10 qarashadan bastap, 4 jeltoqsanda aiaqtalady. Osyǵan orai «Birlik» saiasi partiiasynyń nazaryn osy kezeńde Shymkent qalasy men Túrkistan oblysynda filal ashyp, ony tirkeýden ótkize alsa, onda atalǵan óńirlerde máslihattar depýtattaryn sailaýǵa qatysýǵa múmkindikteri bar ekendigine aýdartqym keledi», - dedi Berik Imashev.
