QR DSM Qoǵamdyq densaýlyq saqtaý komitetiniń tóraǵasy Jandarbek Bekshin oqýshylardyń kún rejimin qatań saqtaýǵa shaqyrdy, habarlaidy QazAqparat.
«Oqýshylardyń kún rejimi máselesine nazar aýdarǵym keledi. Árine, mektepke baratyn ýaqytta balalardy kún rejimin oryndaýǵa daiyndaýymyz kerek», - dedi Bas sanitarlyq dáriger Ortalyq kommýnikatsiialar qyzmetinde.
Rejim degen uǵymǵa is-qimyldyń, demalýdyń jáne tamaqtanýdyń barlyq túrlerin táýlik boiy uiymdastyrý jáne bólý kiredi. Kez kelgen retsizdik balanyń densaýlyǵyna, iaǵni kóńil-kúiine, sabaq úlgerimine áser etedi. Atap aitqanda, oqýshynyń densaýlyǵyna uiqy, tamaqtaný jáne qozǵalys belsendiliginiń yqpaly zor.
«Balanyń jas ereksheligine qarai uiqysy qanýy kerek. Oqýshylar úshin túngi uiqynyń shamalanǵan normasyna toqtalsaq, 1-4-synyptarda 10-10,5 saǵatty, 4-7-synyptarda - 9,5-10 saǵatty, 8-9-synyptarda - 9-9,5 saǵatty, sondai-aq 10-11-synyptarda - 8-9-saǵatty quraýy kerek», - dedi ol.
J. Bekshinniń sózine qaraǵanda, oqýshylarǵa emtihan aldynda, baqylaý jumysynyń aldynda jáne basqa da aqyl-oi júktemesi kezinde ádettegi uiqy ýaqytyn (keminde 1 saǵatqa) uzartý kózdelgen.
«Birinshi synyp oqýshylaryna múmkindiginshe kúndizgi uiqyny (2 saǵatqa sozylatyn) uiymdastyrý usynylady», - dep naqtylady ol.
Belgili bolǵandai, 2-2,5 saǵatqa erte oianyp, uiqysy qanbaityn balalardyń sabaqtaǵy belsendiliginiń deńgeii 30 paiyzǵa tómendeidi.
