Ekonomikalyq máseleler boiynsha jumys tobynyń otyrysynda birqatar másele kún tártibinen alynyp tastaldy. Bul týraly QR Aýyl sharýashylyǵy ministrligi jer reformasy komissiiasynyń otyrysynda ekonomikalyq jumys tobynyń jetekshisi Aqylbek Kúrishbaev aitty, dep habarlaidy QazAqparat.
«Ekonomikalyq máseleler boiynsha jumys tobynyń otyrysyna aýyl sharýashylyǵy maqsatyndaǵy jerlerdi tek Qazaqstan azamattaryna berý máselesi qaraldy. Bul másele kún tártibinen alynyp tastaldy, sebebi ol boiynsha Memleket basshysynyń naqty saiasi sheshimi bar. Bul problema zań sheńberinde sheshiledi, iaǵni aýyl sharýashylyǵy maqsatyndaǵy jerler tek qazaqstandyq azamattarǵa beriledi», - deidi ekonomikalyq jumys tobynyń basshysy Aqylbek Kúrishbaev.
Onyń aitýynsha, aýyl sharýashylyǵy jerlerin paidalanbaǵany úshin salyqty kóterý máselesi de kún tártibinen alynyp tastaldy.
«Sebebi bul másele boiynsha 2020 jylǵy 10 jeltoqsanda salyq mólsherlemesin jiyrma eselengen mólsherde kóterýdi kózdeitin tiisti zań qabyldandy. Sondyqtan atalǵan máseleni Muhtar Taijannyń usynysymen komissiianyń qaraýynan alyp tastap, keiin birińǵai agrarlyq salyqty qarastyrý aiasynda talqylaý usynyldy. Bul usynys jumys toby múshelerinen qoldaý tapty. Qazirgi ýaqytta jer máselesine qatysty kóp suraq kelip jatyr, ony qaraýǵa uzaq ýaqyt qajet. Qazirgi ýaqytta birinshi kezekte Jer kodeksiniń tek moratoriige qatysty máselelerin qarasaq degen usynysym bar. Óitkeni jańa zań jobasyn qabyldaýǵa úlgermei qalýymyz múmkin», - deidi ol.
