ەكونوميكالىق مەسەلەلەر بويىنشا جۇمىس توبىنىڭ وتىرىسىندا بٸرقاتار مەسەلە كٷن تەرتٸبٸنەن الىنىپ تاستالدى. بۇل تۋرالى قر اۋىل شارۋاشىلىعى مينيسترلٸگٸ جەر رەفورماسى كوميسسيياسىنىڭ وتىرىسىندا ەكونوميكالىق جۇمىس توبىنىڭ جەتەكشٸسٸ اقىلبەك كٷرٸشباەۆ ايتتى, دەپ حابارلايدى قازاقپارات.
«ەكونوميكالىق مەسەلەلەر بويىنشا جۇمىس توبىنىڭ وتىرىسىنا اۋىل شارۋاشىلىعى ماقساتىنداعى جەرلەردٸ تەك قازاقستان ازاماتتارىنا بەرۋ مەسەلەسٸ قارالدى. بۇل مەسەلە كٷن تەرتٸبٸنەن الىنىپ تاستالدى, سەبەبٸ ول بويىنشا مەملەكەت باسشىسىنىڭ ناقتى ساياسي شەشٸمٸ بار. بۇل پروبلەما زاڭ شەڭبەرٸندە شەشٸلەدٸ, ياعني اۋىل شارۋاشىلىعى ماقساتىنداعى جەرلەر تەك قازاقستاندىق ازاماتتارعا بەرٸلەدٸ», - دەيدٸ ەكونوميكالىق جۇمىس توبىنىڭ باسشىسى اقىلبەك كٷرٸشباەۆ.
ونىڭ ايتۋىنشا, اۋىل شارۋاشىلىعى جەرلەرٸن پايدالانباعانى ٷشٸن سالىقتى كٶتەرۋ مەسەلەسٸ دە كٷن تەرتٸبٸنەن الىنىپ تاستالدى.
«سەبەبٸ بۇل مەسەلە بويىنشا 2020 جىلعى 10 جەلتوقساندا سالىق مٶلشەرلەمەسٸن جيىرما ەسەلەنگەن مٶلشەردە كٶتەرۋدٸ كٶزدەيتٸن تيٸستٸ زاڭ قابىلداندى. سوندىقتان اتالعان مەسەلەنٸ مۇحتار تايجاننىڭ ۇسىنىسىمەن كوميسسييانىڭ قاراۋىنان الىپ تاستاپ, كەيٸن بٸرٸڭعاي اگرارلىق سالىقتى قاراستىرۋ اياسىندا تالقىلاۋ ۇسىنىلدى. بۇل ۇسىنىس جۇمىس توبى مٷشەلەرٸنەن قولداۋ تاپتى. قازٸرگٸ ۋاقىتتا جەر مەسەلەسٸنە قاتىستى كٶپ سۇراق كەلٸپ جاتىر, ونى قاراۋعا ۇزاق ۋاقىت قاجەت. قازٸرگٸ ۋاقىتتا بٸرٸنشٸ كەزەكتە جەر كودەكسٸنٸڭ تەك موراتورييگە قاتىستى مەسەلەلەرٸن قاراساق دەگەن ۇسىنىسىم بار. ٶيتكەنٸ جاڭا زاڭ جوباسىن قابىلداۋعا ٷلگەرمەي قالۋىمىز مٷمكٸن», - دەيدٸ ول.
