Damir men Dáýlet Kósheevter salmaǵy 35 keli sómkeni iyqqa asyp, Almatydan Shyǵys Qazaqstan oblysy Abai aýdanyndaǵy Jidebai qoryǵyna jaiaý jetken. Jigitterdiń 12 maýsymda bastalǵan saparlary 46 kúnge sozylypty. Shildeniń shilińgir ystyǵy qansha qajytsa da ekeýi bastaǵan isterin sońyna deiin jetkizbei qoimaǵan. QazAqparat tilshisi volonterlermen tildesip, uzaq jolda qandai qiyndyqtar kezdeskenin surap kórdi.
Jidebaiǵa jaiaý tartty
Aǵaiyndy Damir men Dáýlet Almaty qalasynda turady. Naýryz aiynda ońtústik astanada karantin jariialanǵaly beri ekeýi volonterlikpen bilek sybana ainalysa bastaǵan. Olar demeýshiler taýyp, muqtaj jandarǵa azyq-túlik pen kerek-jaraqtardy jetkizip turdy.
«Biyl elimizde Volonterler jyly ekeni belgili. Sondai-aq uly Abaidyń 175 jyldyǵy da atap ótilýde. Birde kókeiimizge erekshe oi sap ete tústi: eger osy eki sharany biriktirip, barsha qazaqstandyqtardyń nazaryn aýdaratyn joba uiymdastyrsaq qalai? Ol qyzyqty ári aýqymdy bolýy tiis. Sóitip túrli ideialardy ortaǵa saldyq», - deidi Damir Kósheev.
Aqyldasa kele aǵaiyndylar hakimniń týǵan ólkesine jaiaý barýǵa sheshim qabyldaǵan. Olar óz jobalaryn «Abai joly» dep atady. Eriktiler Almaty qalasynyń jáne «Rýhani jańǵyrý» jalaýlaryn ózderimen alyp, Jidebai qoryǵyna tigýge bel bailaǵan.
«Bizdi qoldaǵandar az bolǵan joq. Senim artyp, oiymyzdy quptap, sáttilik tilegenderge rizashylyǵymyzdy bildirdik. Sporttyq kiim alyp berip, jaqyndarymyzben spýtniktik bailanys uiymdastyrǵan demeýshiler de tabyldy. Árine synai qarap, bunymyzdy bos áýreshilikke balaǵandar da ushyrasty. Negizinen bizdiń birneshe maqsatymyz bar-tuǵyn. Áýelgisi, Abaidyń týyp-ósken óńirindegi qasietti jerlerdi kózben kórý. Ekinshisi, dúiim jurttyń hakimniń kindik qany tamǵan aimaqqa degen qyzyǵýshylyǵyn oiatý. Rasymen de, jobamyzdy jariialaǵan soń ǵalamtorda Jidebai jaily izdengender kóbeia túskenin baiqadyq. Úshinshiden, ózimizdiń kúsh-jigerimizdi, tózimdiligimizdi synap kórgimiz keldi. Sońyna deiin shydai alamyz ba, maqsatymyzǵa jete alamyz ba, sony tekserýdi jón kórdik», - deidi Damir.
Aǵaiyndy Kósheevter ataq-abyroiǵa umtylmaǵan. Olar Instagram jelisindegi ózderiniń paraqshalarynda ekspeditsiia týraly onlain kúndelik júrgizip otyrdy. Almatylyq turǵyndardyń bul saparyna myńdaǵan adam kýá boldy. Eriktiler tek qazaqstandyqtardyń emes Resei, Túrkiia jáne Eýropa elderi turǵyndarynyń nazaryn aýdarǵan.
Kúnine 25-30 shaqyrymdy artqa tastaǵan
12 maýsymda eriktiler Almaty qalasynan jolǵa shyqty. Bastapqyda 4 adam bolǵanymen, keiinnen ekeýi densaýlyq jaǵdaiyna bailanysty márege jete almady. Volonterlerdiń eshqaisysy buryndary jeńil atletikamen ainalyspaǵan, turaqty túrde júgirip turmaǵan. Mysaly, osy sapardan buryn Damir Kósheevtiń salmaǵy 115 keli bolǵan eken.
«Almatydan shyǵar kezde bizge bir top sportshylar paidaly keńester berdi. Mysaly, shekten tys kóp júrgende aiaqtyń isinetindigin eskertti. Sondyqtan demalǵan kezde otyrmai, aiaqty kóterip jatý kerektigin aitty. Sol úshin tórt-bes shaqyrym artqa tastaǵan soń, jerge jatyp aiaǵymyzdy sómkeniń ústine qoiyp demalyp alamyz. Bul qan ainalymyn jaqsartýǵa jáne isinýdi azaitýǵa kómektesti», - deidi volonter.
Tańerteń deneleri sharshap, aiaqtary talsa da jigitter jattyǵý jasap qaitadan «Jidebai qaidasyń?» dep jolǵa shyǵyp otyrdy. Eriktilerdiń arqasynda aýyr sómkeleri boldy. Onyń ishine eń qajet dúnieler bar: palatka, karemat, konserviler men sý. Sómkeniń salmaǵy – 35 keli.
«Eń qiynǵa soqqan jolymyz «Úsharal-Aiagóz» aralyǵy boldy. Sebebi dámhana, janarmai quiý beketteri men dúkenderdiń araqashyqtyǵy 70 shaqyrymdy qurady. Al biz kúnine 25-30 shaqyrymdy baǵyndyryp otyrdyq. Tamaq jaǵynan qinalmasaq ta aýyzsý máselesi kádimgidei ábigerge saldy. Bir kúnde 6 litrdei sý ishemiz. Osylaisha sýymyz bitkende kelesi dúkenge jetkenshe tózýge týra keldi», - deidi Damir Kósheev.
46 kúnde 1200 shaqyrymdy baǵyndyrdy
Aǵaiyndylardyń aitýynsha, jol boiyndaǵy keibir dámhana qojaiyndary olardyń Jidebaiǵa jaiaý bara jatqanyn estigende tegin tamaqtandyrǵan. Al jergilikti aýyl turǵyndary kezdese qalsa úilerine qonaqqa da shaqyrǵan.
«Taldyqorǵan-Óskemen» jolyndaǵy jumysshylar bizdi qushaqjaia qarsy aldy. Dastarqanǵa shaqyryp báiek bolyp kútip jiberdi. Tipti bir azamat qaltasynan 10 myń teńge aqsha alyp usyndy. Álbette, sypaiy bas tarttyq. Qarapaiym azamattardyń osyndai keń peiiline riza boldyq. Jóitkip bara jatqan keibir kólik júrgizýshileri bizdi kórip toqtap, «Qandai da bir kómek kerek pe?» dep surap jatty. «Nege atpen nemese velosipedpen barmadyńdar?» degender de boldy. Shildeniń mi qainatar ystyq kúnderinde saparymyz aýyrlai tústi. Alaida, bastaǵan isti sońyna deiin jetkizý úshin jigerimizdi janyp, tózimdilik tanyttyq. Qas qaraiǵan kezderde «Kelińder, otyryńdar. Eshkimge aitpai biraz jerge deiin aparyp tastaiyq» degen kólik júrgizýshileriniń qiturqy usynysyna shamdanbai «Ózimizben spýtniktik bailanys alyp júrmiz. Bizdi baqylap otyrǵandar bar» dep túsindirdik. Kieli jerge bara jatqan saparymyzda ózimizdi-ózimiz aldasaq keshirilmes kúná bolar edi», - deidi Damir.
Osylaisha, Damir men Dáýlet uzaq joldy eńserip Jidebaiǵa da jetti-aý áiteýir. Eriktiler 46 kúnde 1200 shaqyrymdy baǵyndyrǵan. Qazir Damirdiń salmaǵy – 100 keli. Iaǵni osy sapar kezinde ol 15 keli tastady.
«Bes jasar ulym «Men de óskende Jidebaiǵa jaiaý jetemin» deidi (kúldi). Biraq oǵan áli erte ekendigin túsindirdim. Buiyrtsa, arada 25 jyl ótkende balam orda buzar otyzǵa keledi. Al sol kezde Abaidyń 200 jyldyǵy bolady eken. Qudai qalasa, bul mereitoida 1200 shaqyrymdy ulymmen birge júrip ótsem deimin», - deidi volonter bolashaqqa nyq senimmen qarap.
