Qyzylordalyq politsei Darhan Ábdikárimov byltyr kóp qabatty úide bolǵan órtte bir otbasynyń ómirin saqtap qaldy, dep habarlaidy QazAqparat.
Búginde QR Ishki ister ministrligi Kóliktegi politsiia departamentiniń Qyzylorda stantsiiasyndaǵy jelilik politsiia bóliminde qyzmet atqaratyn qyraǵy politsei syn sátte syr bergen joq. Qyzyl jalyn qushaǵyna oranǵan páter ishinen otbasy múshelerin syrtqa alyp shyqty. Oqiǵa byltyr 16 qazanda bolǵan.
«Bul sátte men sekildi jigitterdiń barlyǵy da solai áreket eter edi dep oilaimyn. Ony erlik dep sanaǵan emespin. Oblys ortalyǵyndaǵy ózim turatyn kóp qabatty úidiń ekinshi qabatyndaǵy páterden janushyra kómek suraǵan áieldiń daýysyn estigende birden-aq oqiǵa ornyna jettim. Qyzyl jalyn biraz jerdi sharpyp úlgergen eken. Oilanyp turatyn ýaqyt joq. Páterdiń ishinen kirip kettim. Aldymen bir jasar sábidi syrtqa shyǵaryp úlgerdim. Sol qarbalas sátte júrip baiqaǵanym, tilsiz jaý jýynatyn bólmeden shyqqan eken. Alǵashqy sátte úidegi úlkender ony óz kúshimen sóndirýge tyrysqan. Degenmen ol barlyq bólmege tarap ketken», - dedi Darhan bizben áńgimesinde.
Mundai sátte órtpen arpalysqan adam jyldam sheshim qabyldaýy tiis. Darhan qyzyl jalyndy aýyzdyqtaý maqsatynda páter ishindegi elektr jelisin ajyratýǵa tyrysty. Odan keiin tez janatyn jáne jarylý qaýpi zor dúnielerdi órt ishinen syrtqa shyǵaryp úlgerdi.
«Órtti sóndirý maqsatynda kórshilerdiń barlyǵy atsalysty. Bul qaýip-qaterge toly sátter bolatyn. Sol bir ýaqytta barlyǵymyz bir kisidei jumylyp, bir otbasynyń amandyǵyna sebepshi boldyq», - deidi ol.
Darhan Ábdikárimov Syrdariia aýdanyna qarasty S. Seifýllin aýylynda dúniege kelgen. Ata-anasy Esenkeldi men Almash perzentiniń osyndai erekshe qasietterin árdaiym kópshilikke maqtan etedi. Ol ózi týyp-ósken aýyldaǵy №137 qazaq orta mektebinde bilim aldy. Odan keiin Qorqyt ata atyndaǵy Qyzylorda memlekettik ýniversitetiniń qarjy jáne nesie mamandyǵy boiynsha bilim aldy. Al zańgerlik mamandyqty Shymkent qalasyndaǵy joǵary oqý ornynda syrttai bitirdi. Óziniń eńbek jolynda 17 jyldan astam ishki ister salasynda tabandy eńbek etip keledi. Tájiribeli maman búginde QR IIM Kóliktegi politsiia departamentiniń Qyzylorda stansasyndaǵy jelilik politsiia bóliminde abyroily qyzmet atqarýda. Ol jary Manatpen birge otbasynda eki ul, bir qyz tárbielep otyr.
Tájiribeli tártip saqshysy Darhan Esenkeldiuly QR IIM-niń jáne Kóliktegi politsiia departamenti basshylyǵynyń «Alǵys hatymen» birneshe márte jáne arnaiy tósbelgisimen marapattalǵan.
