Foto: Ulttyq óner mýzeiiniń baspasóz qyzmeti
2025 jyldyń 12 qyrkúieginde saǵat 16:00-de Ábilhan Qasteev atyndaǵy QR Ulttyq óner mýzeiiniń Ortalyq kórme zalynda almatylyq sýretshi Svetlana Kakotkinanyń «Bir ǵajap kún» atty kórmesiniń ashylýy ótedi. Kórmede avtordyń 80-ge jýyq týyndysy kópshilik nazaryna usynylady.
Svetlana Kakotkina Almaty qalasynda dúniege kelgen. Bilimi boiynsha – dizainer, sáýletshi. Bastapqy kórkemdik bilimin «Klassikalyq óner gimnaziiasynda» alǵan. 2002 jyly Qazaq bas sáýlet-qurylys akademiiasyn «Dizain» mamandyǵy boiynsha támamdaǵan. Stýdenttik jyldarynan bastap túrli baiqaýlar men kórmelerge qatysyp, shyǵarmashylyq belsendilik tanytty.
Kórme «Kúz», «Qys», «Kóktem», «Jaz» atty toptamalardan turady. Kórmege qoiylǵan jumystar bizdiń qalamyz ben onyń tóńiregindegi serýenderden týyndaǵan áserler negizinde dúniege kelgen. Árbir kúnnen, árbir plenerden shabyt alǵan sýretshi bul kórmeni jai ǵana kartinalar toptamasy emes, óz sezimderi men baqylaýlarynyń tiri kúndeligine ainaldyrdy. Árbir kenep – belgili bir sáttiń kórinisi ispetti: ózen ústin japqan tańǵy tuman, batyp bara jatqan kúnniń tógilgen altyn shapaǵy, shóp arasyndaǵy kóleńkeniń oiyny.
Foto: Ulttyq óner mýzeiiniń baspasóz qyzmeti
Sýretshiniń «impressionizm» baǵytyna degen qushtarlyǵy aiqyn kórinedi. Tabiǵattan alǵan shabyty arqyly ol óz týyndylarynda erkindikke umtylady. Bul kórme – sýretshiniń sheberhanasynda da, dalada da jasaǵan eńbeginiń nátijesi. Ol plenerlerdi erekshe jaqsy kóredi, sebebi árbir kún, jeldiń ár lebi, kúnniń ár sáýlesi avtordy tereń jeke tolǵanystarǵa jetelep, tabiǵatpen úndesken áserli týyndylarǵa shabyttandyrady.
Foto: Ulttyq óner mýzeiiniń baspasóz qyzmeti
Avtordy jazǵy taýlardaǵy serýender, qala kósheleri men qysqy beineler eshqashan beijai qaldyrmaidy. Osy áserler onyń týyndylarynda jańǵyryp, tipti gúlderdiń názik sulýlyǵyn beineleitin natiýrmorttarda da aiqyn seziledi.
Sýretshi «Bir ǵajap kún» atty kórmesi arqyly kórermenderdi serýenniń siqyryna boilap, kúnniń jylýyn sezinýge, gúl jainaǵan dalanyń hosh iisine elitip, tabiǵat áýenin tyńdaýǵa shaqyrady.
Ekspozitsiia 30 qyrkúiekke deiin jalǵasady.
Kórme kýratory – Aisulý Úsentaeva
