Foto: uiymdastyrýshylardan
Almatyda Muhametjan Tynyshbaiulynyń 1925 jyly jazylǵan «Qazaq halqynyń tarihy» kitabynyń tusaýkeseri ótti. Joba Choco holdinginiń qoldaýymen júzege asqan, dep habarlaidy Ult.kz.
Bul kitap byltyr AmalBooks baspasynan túpnusqada, iaǵni orys tilinde jaryq kórgen. Bir ǵasyr boiy qazaq tiline aýdarylmaǵan kitapty endi óz tilimizde oqi alamyz.
Tusaýkeserge Muhametjan Tynyshbaiulynyń jien nemeresi, «M.Tynyshbaiuly atyndaǵy qordyń» tóraiymy Nurshaken Júnisova, sondai-aq tarihshylar men ǵalymdar, túrli BAQ ókilderi qatysty
Foto: uiymdastyrýshylardan
Kitapty qazaq tiline aýdarǵan AmalBooks baspasynyń negizin qalaýshy Baqytjan Buqarbai: «Muhametjan Tynyshbaiulynyń eńbegin qazaq tiline aýdaryp shyǵarý elimiz úshin óte mańyzdy oqiǵa. Muhametjan Tynyshbaiuly – júz jyl buryn, patsha úkimeti kezinde elimizdiń tarihynyń mańyzyn dáleldep tutas ǵylymi eńbek jazyp ketken tarihshy ǵalym. Alǵashqy temirjol injeneri, sol kezdegi dýmanyń alǵashqy depýtaty. Osy kitapty qazaq tiline aýdarýǵa AmalBooks bastamashyl bolyp, ony ary qarai júzege asyrýǵa kómektesken Choco holdinginiń basshysy Ramil myrza men ózge mamandarǵa da alǵysym sheksiz!» deidi
Kitaptyń qazaqsha shyǵýyna qoldaý kórsetken Choco holdinginiń basshysy Ramil Mýhoriapovtyń pikirinshe, bul kitaptyń qazaq tiline aýdarylýy elimiz ben ózimizdi tanýǵa kóp kómektesedi.
«Muhametjan Tynyshbaiuly óz dáýiriniń eleýli tulǵasy, injeneriia, tarih salasyn zerttegen jan-jaqty ǵalym. «Qazaq halqynyń tarihy» kitaby árqaisymyz qasterlei oqityn eńbek. Osyndai kitaptar arqyly ózimizdi tani túsemiz. Ár úidiń tórinde turatyn kieli kitaptardan keiin el men jer, halyqtyń tarihyn baiandaityn osyndai eńbekter bolýy tiis dep oilaimyn» deidi Ramil Mýhoriapov.
Muhametjan Tynyshbaiuly (1879-1937) qazaqtyń kórnekti ziialysy, Túrkistan avtonomiiasynyń birinshi premer-ministri, zertteýshi-tarihshy. «Qazaq halqynyń tarihy» qazaqtardyń shyǵý tarihy jan-jaqty ári kórkem túrde áńgimeleidi. Qazaq halqy degen uǵymdy quraityn túp-tamyr men tarmaqtardy, qazaqtyń rý-taipalaryn tereńinen sipattaidy. Sondai-aq kitapta qazaq shejiresi qosymsha keste túrinde berilgen.
Júz jyldan soń jaryq kórgen kitap óz tarihyna beijai qaramaityn qalyń oqyrmanǵa arnalady.
