Jyl basynan beri Qazaqstanda 53 adam sýda mert boldy. Bul týraly QR TJM Azamattyq qorǵanys jáne áskeri bólimder komitetiniń tóraǵasy Baýyrjan Syzdyqov aityp berdi, dep habarlaidy "Ult aqparat".
Spikerdiń aitýynsha, shomylý maýsymy 1 maýsymda resmi bastalady jáne 1 qyrkúiekke deiin sozylady.
«Ókinishke qarai, sýǵa túsý maýsymy bastalmasa da, 53 adam qaza tapty, onyń ishinde 26 bala bar. Jyl basynan beri sý aidyndarynan 38 adam, onyń ishinde 4 bala qutqaryldy. Ásirese balalardyń sýda mert bolýy jaǵdiy kóbeigen. Byltyr osy kezeńde 18 bala mert bolsa, biyl 26-ǵa jetti», - dedi Baýyrjan Syzdyqov Ortalyq kommýnikatsiialar qyzmetinde ótken brifingide.
Bir ǵana ótken aptada 17-23 mamyr aralyǵynda sý aidyndarynda 12 adam, onyń ishinde 2 bala sýǵa batyp kóz jumdy.
«Sýda qaza bolýdyń basty sebepteri: jabdyqtalmaǵan, tyiym salynǵan jerlerde shomylý (25 jaǵdai), balalardy qaraýsyz qaldyrý (18 jaǵdai), sý qoimasyna qulap ketý jáne óz kúshin durys baǵalamaý (16 jaǵdai), jeke qutqarý quralynsyz balyq aýlaý (11 jaǵdai), keýdeshesiz júzý quralyn (katamarandy) paidalaný jáne mas kúide sýǵa túsý», - dep túsindirdi komitet tóraǵasy.
Aita keteiik, elimizde shomylýǵa ruqsat berilgen 469 oryn bar, onyń ishinde 118 kommýnaldyq jáne 275 jeke jaǵajai belgilengen. Shomylýǵa ruqsat etilgen jáne tyiym salynǵan oryndar 2GIS kartasynda kórsetiledi.
Shomylý maýsymy bastalmai-aq ereje buzǵan 242 adam ákimshilik jaýapqa tartylyp úlgerdi.
