Álemdegi eń iri kriptovaliýta birjalarynyń biri Binance hakerlik shabýylǵa ushyrady. Ziiankester birjanyń ystyq ámiiandarynan shamamen 6,3 mlrd dollarlyq kriptoaktivti shyǵarǵan. Onyń 3 mlrd dollarǵa jýyǵyn buǵattaýǵa múmkindik bolǵan. Bul týraly Binance málimdedi, dep habarlaidy ult.kz.
Aldyn ala málimet boiynsha, hakerler birja injenerleriniń biriniń noýtbýgin buzý arqyly ishki júielerge qol jetkizgen. Sonyń nátijesinde kriptoaktivterdi ruqsatsyz shyǵarý operatsiialary jasalǵan. Qazir shabýyldyń naqty qalai júzege asqany tergelip jatyr.
Oqiǵadan keiin Binance qaýipsizdik sharalaryn kúsheitip, qarajat engizý men shyǵarý operatsiialaryn ýaqytsha toqtatty. Kompaniia klientterdiń shyǵynyn saqtandyrý qory SAFU jáne óz qarajaty esebinen tolyq óteitinin málimdedi.
Tether pen Circle siiaqty steiblkoin emitentteri de buǵattaý jumystaryna qatysqan. Nátijesinde shamamen 3 mlrd dollarlyq aktivti toqtatýǵa qol jetkizilgen.
Kibershabýyl kriptovaliýta naryǵyna da áser etti. Bitcoin baǵasy 4 paiyzdan astam tómendep, Ethereum quny da arzandady. Al Binance-tiń BNB tokeni shamamen 9 paiyzǵa quldyrady. Sonymen qatar fiýcherstik naryqta 1,48 mlrd dollardan astam pozitsiia májbúrli túrde jabylyp, 242 myńnan astam treider zardap shekken.
Bul kriptovaliýta tarihyndaǵy eń iri hakerlik shabýyldardyń biri sanalady. Buǵan deiingi rekord 2025 jyly Bybit birjasynda tirkelgen edi. Ol kezde shamamen 1,5 mlrd dollarlyq kriptoaktiv urlanǵan.
