Búgin Úkimettiń keńeitilgen otyrysynda Prezident Qasym-Jomart Toqaev sapasyz bilim beretin joǵary oqý oryndaryna qatysty eskertý aitty, dep habarlaidy "Ult aqparat".
Prezidenttiń aitýynsha, Úkimetke joǵary oqý oryndary úshin bólinetin memlekettik granttardy naryqtyń naqty suranystarymen tyǵyz bailanystyrý maqsaty júktelip tur. Jyl saiyn bólinetin granttardyń bir bóligi tiisti mamandyqtardyń suranysymen qamtamasyz etilmegen. Osy oraida biýdjet qarjysy jelge ushady.
«Meniń tapsyrmam boiynsha Úkimet sapasyz bilim berip jatqan joǵary oqý oryndaryn qysqartý jumysyn jalǵastyryp jatyr. Alaida keibir JOO-lar túrli protsessýaldyq árekettermen oqý ornyn jabý protsesin 1,5 jylǵa deiin sozyp keledi. Bilim jáne ǵylym ministrligine qarsy aqparattyq naýqan júrip jatyr. Úkimetke tiisti sharalardy qabyldaýdy tapsyramyn», - dedi Memleket basshysy.
Sonymen birge Prezident akademiialyq adaldyqty buzǵany úshin JOO-lar jaýapkershiligin qosymsha kúsheitý kerektigin atap ótti.
Toqaev sapaly bilim berip jatqan joǵary oqý oryndaryn jan-jaqty nyǵaitý kerektigin tapsyrdy. Turaqty damýdy qamtamasyz etý úshin 15 bazalyq óńirlik joǵary oqý oryndaryn jańǵyrtý kerektigi aityldy. Olar talanttardy tartýdyń óńirlik ortalyqtary retinde qyzmet etedi. Osy oraida Úkimetke ákimdiktermen birlese 1 shildege deiin tiisti qadamdarmen, kezeńdermen ári qarjylandyrý kólemimen tyńǵylyqty jol kartasyn engizý júkteldi.
