Bilim jáne ǵylym eks-vitse-ministri Saiat Shaiahmetov 7 jylǵa bas bostandyǵynan aiyryldy, sondai-aq, onyń múlki tárkilendi, - dep habarlaidy kaz.tengrinews.kz tilshisi sot zalynan.
Astananyń Almaty aýdandyq №2 soty Bilim jáne ǵylym ministrliginiń burynǵy vitse-ministrine qatysty isti aiaqtady.
"Sot Shaiahmetov Saiat Bolatulyna QR Qylmystyq kodeksiniń 176-baby, 4-bóligi, b tarmaǵyna sáikes, qylmys jasaǵany úshin aiypty dep tanyp, jeti jylǵa bas bostandyǵynan aiyrý jazasyn taǵaiyndady. Múlki tárkilenip, bes jylǵa deiin memlekettik qyzmette jumys isteý quqyǵynan aiyrylsyn. Jazasyn ortasha qaýipsiz qylmystyq-atqarý júiesi mekemesinde ótesin", - dep oqydy úkimdi sýdia Qulbaeva.
Saiat Shaiahmetov tórt jyl boiy tergeýde bolǵan edi. Oǵan qatysty is 2014 jyldyń jazynda bastalǵan bolatyn. Sol jyldyń qazan aiynda bilim jáne ǵylym ministrliginiń burynǵy vitse-ministrine qatysty is qaita tergeýge jiberildi.
2013 jyldyń 29 sáýirinde qarjy politsiiasy Óskemende 700 oryndyq bilim berý mekemesi qurylysy kezinde biýdjettiń bir milliard teńgeden astam qarajatyn iemdený jáne talan-tarajǵa salý deregi boiynsha qylmystyq is qozǵaǵan bolatyn. Kúdik boiynsha Bilim jáne ǵylym vitse-ministri Saiat Shaiahmetov pen "QR salynyp jatqan bilim jáne ǵylym nysandary direktsiiasy" JShS bas direktory A.Pak ustaldy. Sol jyldyń 17 mamyrynda Shaiahmetov sottyń sanktsiiasymen úi qamaýyna alynyp, ekinshi figýrant tutqyndaldy. Sonymen qatar, taǵy eki adam sottalýshylar qataryna qosylǵan bolatyn - "ZAK Servis" JShS qyzmetkerleri Roman Kireev pen Aleksei Týtýbalin.
Shaiahmetov vitse-ministr qyzmetine 2011 jyldyń qazan aiynda taǵaiyndalǵan bolatyn. Ózine qatysty qylmystyq is qozǵalǵan kezde, naqty aitqanda, 2013 jyldyń 8 mamyrynda ol ózge jumysqa aýysýyna bailanysty qyzmetinen bosatylǵan edi.
