Foto: freepik
Sybailas jemqorlyqqa qarsy qyzmet bilim berý salasyndaǵy iri jymqyrýlardy tergeýdi jalǵastyryp jatyr. Qylmystar memlekettik aýditorlardyń jasyrýymen jasalǵany qylmystyq isterdiń materialdarymen rastaldy, dep habarlaidy "Ult aqparat" Antikor baspasóz qyzmetine silteme jasap.
Máselen, Jetisý oblysynda biýdjet qarajaty «óli jandardyń» shottaryna aqsha aýdarý jáne mektep qyzmetkerleriniń jalaqysyn asyra eseptep, keiinnen olardy qolma-qol aqshaǵa ainaldyrý men iemdený arqyly urlanǵan.
Tergeý barysynda Almaty oblysy Tekserý komissiiasynyń memlekettik aýditory 500 myń teńge somasynda para alǵany áshkerelendi. Ol Taldyqorǵan qalasyndaǵy mektepterdiń birinde aýditorlyq tekseristiń oń qorytyndysy úshin para alǵan.
Qazirgi ýaqytta aýditor sotqa tartylǵan.
"Osyǵan uqsas fakt Almaty oblysynda anyqtaldy, onda oblystyq tekserý komissiiasy bóliminiń basshysy Qarasai aýdanynyń bilim bóliminiń býhgalterinen aýditorlyq tekserýdiń oń nátijeleri úshin 1 mln teńge somasynda para alǵan. Atalǵan derek boiynsha Almaty oblysynyń Sybailas jemqorlyqqa qarsy qyzmeti sotqa deiingi tergeý júrgizip jatyr.
Sonymen qatar Túrkistan oblysynda memlekettik revizor - oblystyq Tekserý komissiiasynyń bas inspektory paraqorlyqpen áshkerelendi. Ol Saryaǵash aýdanyndaǵy mektepterdiń birinde aýditorlyq tekseristiń oń qorytyndysy úshin 26 mln teńge kóleminde para aldy degen kúdikke ilindi", - delingen habarlamada.
Kúdikti ustalyp, ýaqytsha ustaý izoliatoryna qamalǵan.
Qylmystyq-protsestik kodeksiniń 201-babyna sáikes ózge de aqparat jariia etýge jatpaidy. Konstitýtsiianyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáikes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deiin árbir adam kinásiz dep esepteledi.
