«Jelige sholý» - Bilim jáne ǵylym ministrliginiń áleýmettik jelidegi jańa jobasy. Basty maqsat – jeli qoldanýshylary jazǵan pikirlerge, suraqtarǵa jaýap berý, ózekti máselelerge qatysty kópshilikke durys aqparatty túsinikti tilde jetkizý. Alǵashqy shyǵarylymda QR Bilim jáne ǵylym vitse-ministri Qýanysh Erǵaliev jáne «Bolashaq» halyqaralyq baǵdarlamasy boiynsha Arizona ýniversitetinde bilim alǵan qazaqstandyqtar elimizde Arizona ýniversiteti filialynyń ashylýyna qatysty oqyrmandarymyzdyń suraqtaryna jaýap beredi. Olar ózderiniń oqý tájiribesi jáne qazaqstandyqtarǵa sapaly, halyqaralyq joǵary bilimniń qoljetimdiligi boiynsha qandai múmkindikter berilgeni týraly aitty.
«Bolashaq» baǵdarlamasynyń túlekteri qazirgi talapkerlerge ýniversitet tańdaý aiasy keńeigenin atap ótti. Búginde jastarǵa elimizdegi eń úzdik joǵary oqý oryndarynda, «Bolashaq» baǵdarlamasy boiynsha shetelde nemese úkimetaralyq kelisimder aiasynda Qazaqstanda ashylatyn sheteldik ýniversitetterdiń filialdarynda bilim alý múmkindigi berilip otyr.
Máselen, Ardak Kasanova esimdi jeli qoldanýshysy Arizona ýniversiteti jaiyndaǵy postqa: «Sol ýniverge qarapaiym halyqtyń balalary qalai túsedi?», - degen pikir qaldyrypty. Bul suraqqa QR Bilim jáne ǵylym vitse-ministri Qýanysh Erǵaliev jaýap berdi. Onyń aitýynsha, bul joba negizinen qarapaiym balalarǵa arnalǵan.
«Eń bastysy balalar aǵylshyn tilin bilýi kerek. Arizona ýniversitetiniń arnaiy emtihany bolady»,- deidi vitse-ministr.
Qýanysh Erǵaliev Aisulý Qasym esimdi oqyrmanymyzdyń: «LGBT resmi túrde úireter Arizona ýniversiteti. Nesine qýanyp máz bolamyz»,- degen saýalyna da jaýap berdi.
«Eń birinshi mynany aitýymyz kerek, Arizona ýniversitetimen kelisim jasaǵan kezde tárbie jumysyn tolyǵymen Qazaqstan jaǵy qadaǵalaidy, baqylaidy dep kelistik. Tárbie jónindegi rektordyń orynbasary Qazaqstan jaǵynan taǵaiyndalady jáne búkil tárbie jumysy bizdiń mentalitetimizge sai, qundylyqtarymyzǵa sai júrgiziledi», - dedi QR Bilim jáne ǵylym vitse-ministri Qýanysh Erǵaliev.
Arizona ýniversitetinde 4 jyl bilim alǵan Baijanov Nurseit te kópshilikti tolǵandyrǵan máselege qatysty pikir bildirdi.
«Men Arizonada 4 jyl boiy oqydym. Men óz kózimen kórdim. Ondai LGBT nasihat esh ýaqytta bolǵan joq. Qazaqstandyq bir de bir stýdent osyndai qaýymǵa qosylǵan joq», - deidi «Bolashaq» halyqaralyq baǵdarlamasynyń túlegi.
Manshýk Serikova esimdi qoldanýshy «Jaqsy habar, onda qandai mamandyqtar boiynsha daiyndaidy?», - degen saýal qaldyrypty.
Bilim jáne ǵylym vitse-ministri Arizona ýniversitetiniń myqty baǵyttary boiynsha basymdyq berilgenin málimdedi. Bul aýyl sharýashylyǵy, injeneriia mamandyqtary.
«Arizona ýniversitetinde tipti meditsina mamandyǵy da myqty bolyp sanalady. Sondyqtan meditsina fakýltetin ashý da josparlanǵan», - dedi Qýanysh Erǵaliev.
Aýylsharýashylyq tehnikasy men tehnologiiasy mamandyǵy boiynsha Arizona ýniversitetiniń túlegi Jańbyrbaev Jandáýlet búginde aýylsharýashylyq salasynda jumys istep júrgen kompaniialardyń til biletin agronomdarǵa, basqa da aýylsharýashylyq mamandaryna suranysy úlken ekenin aitady.
«Agronom aǵylshyn tilin bilse ol óziniń oiyn, pikirin sheteldik áriptesterine tolyq jetkize alsa, bizdiń jahandyq kompaniialarmen qatynasymyz kúsheiedi dep oilaimyn. Qazaqstandyq aýylsharýashylyq mamandarynyń deńgeii kóteriledi dep oilaimyn. Ol bizge álemdik naryqqa jol ashady», - deidi sala mamany.
amway_kazakhstan_2021 «Oqý aqyly bola ma nemese grant bola ma?»,- degen suraq qaldyrypty.
QR Bilim jáne ǵylym vitse-ministri memleket tarapynan granttar bólinetinin málimdedi. Sonymen qatar aqyly oqýǵa da múmkindik beriledi.
«Qazir qarasańyzdar, Qazaqstanda oqimyn deseńiz kóptegen jaqsy ýniversitetterimiz bar. Shetelge baramyn deseńiz, «Bolashaq» baǵdarlamasy bar. Prezidentimizdiń tapsyrmasy boiynsha britaniialyq ýniversitetterdiń, Resei ýniversitetteriniń filialdary ashylyp jatyr. Qazirgi jastarǵa oqýǵa, eńbek etýge, bilim alýǵa barlyq jaǵdai jasaldy», - deidi QR Bilim jáne ǵylym vitse-ministri Qýanysh Erǵaliev.
