Qazaqstannyń bilim jáne ǵylym ministri Erlan Saǵadiev orys tilindegi jańa oqýlyqtarǵa ata-analardyń aitqan synyna jaýap berdi, - dep habarlaidy "Ult aqparat". Aita keteiik, ata-analar oqýlyqtardaǵy slengterge qatysty teris pikir bidirgen edi.
"Orys tili oqýlyqtaryna qatysty aitar bolsam, bizdiń balalarymyz 11 jyl bilim alý barysynda grammatikanyń úlken kólemin úirenedi jáne klassikalyq ádebietti jetkilikti deńgeide bilip shyǵady. Al baǵdarlamanyń az bóliginde zamanaýi orys tilin bersek, budan jaman bolmaidy. Oqýlyqty qurastyrǵandardyń isin quptaimyn, baǵdarlamanyń az bóligi orys tiliniń jańa baǵytyn qoldanýǵa, jańa formaǵa arnalýyn qoldaimyn. Bala alatyn úlken kólemdegi klassikamen birge onyń keń syni túsinigi men orys tiliniń qoldanylýyn biletin bolady", - dedi ministr Astanadaǵy orta mektepterdiń birinde sóz sóilegennen keiin.
Onyń paiymynsha, biz balalardy ótkenge emes búgingi kúnge, bolashaqqa daiyndaimyz. Sondyqtan oqýlyqtyń mazmunyndaǵy shamaly ózgeristerge shoshyna qaraýdyń eshqandai qisyny joq.
Saǵadiev jańa oqýlyqtardy qurastyrýshylarǵa túsinistikpen qaraýǵa shaqyrdy. "Bul turǵyda sabyrly bolý kerek. Balalardy, menińshe, biz ótken shaqqa emes, búgingi ómirge daiyndap jatyrmyz. Al "piarshy" siiaqty sózderge keletin bolsaq, orys tilinde 50 myńnan asa kirme sóz bar. Kún saiyn jańa sózdermen baiyp jatyrmyz, bir kezderi orys tilinde "istoriia" sózi history sózinen kelgen, sol sóz qoldanyla bastaǵanda da jaqtyrmaǵandar bolǵan. Sondyqtan munda qate joq, balalarymyz zamanaýi terminologiiany, tildik qatynastyń barlyq formasyn bilýi tiis, buǵan daiyn bolsyn, onyń ústine bul sózderdi ózderi de qoldanyp júr", - dedi ministr.
